जळगाव, दि. 01 – बुलढाणा येथील प्रगती सार्वजनिक वाचनालय हे साहित्य व सांस्कृतिक उपक्रमांच्या आयोजनासाठी व वाचन संस्कृतीच्या वृद्धीसाठी प्रसिद्ध आहे. या वाचनालयाच्या अध्यक्षा श्रीमती अरुणाताई कुल्ली यांचे नुकतेच निधन झाले असून त्यांच्या स्मरणार्थ विविध सांस्कृतिक उपक्रमांचे आयोजन दर महिन्याला करण्यात येत आहेत.
“मासिक स्मृती समारंभ पर्व २” यात परिवर्तन निर्मित श्रीकांत देशमुख लिखित व शंभू पाटील यांनी नाट्यरूपांतर केलेले “नली” एकलनाट्य १ सप्टेंबर बुधवारी सायं. ६ वा. सादर होणार आहे. या एकलनाट्याचे दिग्दर्शन योगेश पाटील यांचे असून हर्षल पाटील हे सादरकर्ते आहेत.
याप्रसंगी साहित्य अकादमी पुरस्काराने सन्मानित श्रीकांत देशमुख व जेष्ठ रंगकर्मी शंभू पाटील विशेष अतिथी म्हणून उपस्थित राहणार आहेत. कोरोनाच्या काळामुळे हा प्रयोग ऑनलाईन सादर होणार आहे. नाट्यप्रयोगाचे आयोजन प्रगती सार्वजनिक वाचनालयाच्या अध्यक्षा सुजाता कुल्ली व सचीव नरेंद्र लांजेवार यांच्या वतीने करण्यात आले आहे.
