जळगाव, (प्रतिनिधी) : सहकाऱ्यांच्या चांगल्या आरोग्यासाठी जैन इरिगेशनतर्फे विविध कार्यशाळा, उपक्रम राबविले जातात. जागतिक योग दिनानिमित्त विशेष योगाभ्यासाचे नियोजन करण्यात आले होते. यात योगशिक्षिक सूर्यागिरीजी अर्थात सुभाष जाखेटे, योगशिक्षिका कमलेश शर्मा यांनी ‘निरोगी वृद्धत्वासाठी योग’ या संकल्पनेच्या आधारावर योगाभ्यास करुन घेतला. ‘योग’, शरीर, मन आणि आत्म्याचा सुंदर संगम असून मनावर नियंत्रणासाठी योगसाधना केली पाहिजे असे सांगितेल.
कंपनीच्या हजारो सहकाऱ्यांना नियमित योग, व्यायाम आणि व्यसनमुक्त जीवनशैली अंगीकारण्याचा संकल्प केला. अनुभूती निवासी स्कूल, अनुभूती इंग्लीश मिडीअम मधील विद्यार्थ्यांचा नियमीत योग असतोच परंतू योगदिनानिमित्त विशेष सत्राचे आयोजन केले होते.
जैन इरिगेशनच्या विविध आस्थापनांमध्ये जागतिक योग दिन जैन प्लास्टिक पार्क, बांभोरी येथील प्रशासकीय इमारतीसमोरील पटांगणात योगशिक्षक सूर्यागिरीजी अर्थात सुभाष जाखेटे यांनी सहकाऱ्यांना योगाचे प्रशिक्षण दिले. तसेच जैन ॲग्री पार्क, जैन फूड पार्क व जैन एनर्जी पार्कमधील सहकाऱ्यांसाठी स्पाइस रिसीव्हिंग एरिया येथे तर जैन हायटेक प्लांन्ट टाकरखेडा टिश्यूकल्चर पार्कमध्ये कमलेश शर्मा यांनी योग प्रशिक्षण दिले.
योगसत्राच्या प्रारंभी तीन वेळा ओंकार करण्यात आला. त्यानंतर पादांगुली नमन, गुल्फचक्र, जानू-फलक आकर्षण आदी सूक्ष्म व्यायाम, ताडासन, तिर्यक ताडासन, कटीचक्रासन व उत्कटासनाचा सराव घेण्यात आला. प्रत्येक आसनाचे शरीरावरील परिणाम व आरोग्यदायी फायदे समजावून सांगण्यात आले. सत्राच्या शेवटी नाडीशोधन (अनुलोम-विलोम) व भ्रामरी या दोन महत्त्वाच्या प्राणायामांचे प्रात्यक्षिक देऊन ते नियमित करण्याचे आवाहन करण्यात आले. योगशिक्षक सुभाष जाखेटे यांनी योगाचे महत्त्व स्पष्ट करून वयाच्या ८० व्या वर्षीही नियमित योगसाधना केल्याने आरोग्य उत्तम राहत असल्याचे सांगितले.
योग शिक्षिका कमलेश शर्मा यांनी शंखनादाने योग अभ्यासाचे सत्र सुरू केले. सूर्यनमस्कार, फिटनेस डॉन्स, योग, ध्यान, प्राणायाम, विविध आसनांसह समुपदेशनही त्यांनी केले. सूर्यनमस्कारचे फायदे सांगत असतांना त्यांनी शिवशक्ती सूस्तीवर विशेष फिटनेस डान्स करुन सहकाऱ्यांमध्ये ऊर्जा निर्माण केली. जैन ॲग्री पार्क, जैन फूड पार्क व जैन एनर्जी पार्कमधील सहकाऱ्यांसाठी योग साधनेचे नियोजनासाठी वरिष्ठ सहकारी जी. आर. पाटील, भिकेश जोशी यांच्यासह सहकाऱ्यांनी समन्वयन साधले.
