जळगाव, प्रतिनिधी : महाराष्ट्र शासनाच्या अधिवेशनादरम्यान मंजूर करून घेतलेल्या निधीतून शहरातील शिव कॉलनी स्टॉप ते शंभर फुटी रोडपर्यंतच्या महत्त्वाकांक्षी रस्ता कामाचे भूमिपूजन श्रीराम रथोत्सवाच्या शुभमुहूर्तावर आमदार राजुमामा भोळे यांच्या हस्ते संपन्न झाले. संपूर्ण वाघनगर परिसर, पीरबाबा दर्गा आणि गाडगेबाबा चौकाला जोडणारा हा मार्ग शहराच्या दळणवळणासाठी अत्यंत महत्त्वाचा दुवा ठरणार असून, खऱ्या अर्थाने हा प्रकल्प शहरासाठी एक ‘मिनी रिंग रोड’ असेल, असे प्रतिपादन आ. राजुमामा भोळे यांनी यावेळी केले.

या निधीच्या मंजुरीसाठी मुख्यमंत्री देवेंद्र फडणवीस, मंत्री शिवेंद्रराजे भोसले, ना. गिरीश महाजन आणि ना. गुलाबराव पाटील यांचे अमूल्य सहकार्य लाभल्याचे आ.भोळे यांनी सांगितले. या प्रकल्पांतर्गत ज्या ठिकाणी भूमिगत गटारांचे काम अद्याप बाकी आहे, ते येत्या दोन दिवसांत सुरू करण्यात येईल आणि ते पूर्ण होताच रस्त्याच्या प्रत्यक्ष कामाला तातडीने सुरुवात होईल, अशी माहितीही त्यांनी दिली.

केवळ रस्ता तयार करणे हा उद्देश नसून नागरिकांना दर्जेदार रस्ते, चांगल्या सुविधा आणि नियोजनबद्ध विकास उपलब्ध करून देणे हेच आपले ध्येय असल्याचे ते म्हणाले. हा प्रकल्प पूर्ण झाल्यानंतर परिसरातील नागरिकांची वाहतुकीची मोठी सोय होणार असून शहराच्या विकासाला चालना मिळणार आहे.
या भूमिपूजन सोहळ्याला महापौर दीपमाला काळे, उपमहापौर मनोज चौधरी, सभापती डॉ. चंद्रशेखर पाटील, भाजप जिल्हा महानगर अध्यक्ष दीपक सूर्यवंशी यांच्यासह प्रभाग क्रमांक अकराचे नगरसेवक सिंधूताई कोल्हे, ललित कोल्हे, संतोष पाटील, अमृता सोनवणे आणि प्रभाग क्रमांक सातचे नगरसेवक चंद्रशेखर अत्तरदे, अंकिता पाटील व विशाल भोळे यांची प्रमुख उपस्थिती होती.
तसेच शिवकॉलनी परिसरातील प्रा. डॉ. नितीन बारी, मनोज सावंत, मनोज भांडारकर, बंटी नेरपगारे, भिकन हिवराडे, योगेश पाटील, मनोज देवरे, आनंद साळी, संदीप जगताप, प्रीतम गुजर, फकिरा वाणी, ज्येष्ठ नागरिक संघाचे पदाधिकारी, कार्यकर्ते, युवा वर्ग आणि परिसरातील नागरिक मोठ्या संख्येने उपस्थित होते.








