जळगाव, (प्रतिनिधी) : शहरातील प्रभाग क्रमांक ९ मधील संत गजानन कॉलनी आणि शिवधाम मंदिराच्या मागील परिसरात गेल्या काही दिवसांपासून सांडपाणी मोठ्या प्रमाणावर साचत आहे. यामुळे परिसरात दुर्गंधी पसरून नागरिकांना डेंग्यू, मलेरिया यांसारख्या गंभीर आजारांचा सामना करावा लागण्याची परिस्थिती निर्माण होऊ शकते. दरम्यान स्थानिक नागरिकांच्या वाढत्या तक्रारींची दखल घेत उपमहापौर मनोज सुरेश चौधरी आणि स्थायी समिती सभापती डॉ. चंद्रशेखर पाटील यांनी या परिसराला प्रत्यक्ष भेट दिली आणि परिस्थितीची पाहणी केली.
पाहणी दरम्यान साचलेल्या सांडपाण्यामुळे नागरिकांच्या आरोग्याला असलेला धोका लक्षात घेता, उपमहापौर मनोज चौधरी यांनी मनपा प्रशासनाला तात्काळ उपाययोजना करण्याचे आदेश दिले. “साचलेले सांडपाणी उपसण्यासाठी आणि पाण्याचा निचरा होण्यासाठी तातडीने पाईपलाईन टाकून हा रस्ता मोकळा करण्यात यावा,” अशा कडक सूचना त्यांनी संबंधित विभागाला दिल्या.
यावेळी लोकप्रतिनिधींसोबत महानगरपालिकेचे आरोग्य निरीक्षक महेश ठाकूर, बांधकाम इंजिनियर विशाल सुर्वे मनपाचे इतर संबंधित कर्मचारी उपस्थित होते.
