जळगाव, (प्रतिनिधी) : जिल्ह्यात अवैध हत्यारे व अग्निशस्त्र बाळगणाऱ्यांविरुद्ध धडक कारवाई करण्याचे आदेश जळगावचे पोलीस अधीक्षक डॉ. श्रीकांत धिवरे यांनी दिले आहेत. या पार्श्वभूमीवर पिंपळगाव हरे पोलिसांनी शनिवारी (दि. १३) सातगाव (ता. पाचोरा) शिवारात सापळा रचून एका संशयिताला ताब्यात घेतले. त्याची अंगझडती घेतली असता, त्याच्याकडून २० हजार रुपये किमतीचे एक गावरान बनावटीचे पिस्तूल (मॅग्झिनसह) जप्त करण्यात आले आहे. याप्रकरणी पोलिसांनी आरोपीला रंगेहात अटक केली असून त्याच्याविरुद्ध गुन्हा दाखल करण्यात आला आहे.
किशोर लक्ष्मण पाटील (वय ३२, रा. सार्व पिंप्री, ता. पाचोरा, जि. जळगाव) असे अटक करण्यात आलेल्या आरोपीचे नाव आहे. पिंपळगाव हरे पोलीस स्टेशनच्या प्रभारी अधिकारी सहायक पोलीस निरीक्षक कल्याणी वर्मा यांना मिळालेल्या गोपनीय माहितीच्या आधारे शनिवार, दि. १३ जून रोजी ही कारवाई करण्यात आली. या गुन्ह्याचा पुढील तपास पोलीस उपनिरीक्षक विठ्ठल पवार करत आहेत.
सदरची यशस्वी कारवाई जळगावचे पोलीस अधीक्षक श्रीकांत धिवरे, अप्पर पोलीस अधीक्षक अशोक नखाते, पाचोरा विभागाचे उपविभागीय पोलीस अधिकारी बापू रोहम यांच्या मार्गदर्शनाखाली पिंपळगाव हरे स्टेशनच्या प्रभारी अधिकारी सपोनि कल्याणी वर्मा, पोहेकॉ अतुल पवार, अभिजित निकम, राहुल बेहेरे, अमोल पाटील, प्रमोद वाडीले आणि नामदेव इंगळे यांच्या पथकाने केली आहे. या उत्कृष्ट कामगिरीबद्दल पोलीस पथकाचे कौतुक होत आहे.
