चोपडा, (प्रतिनिधी) : तालुक्यातील धानोरा येथे आगामी एप्रिल महिन्यात अध्यात्म आणि भक्तीचा अभूतपूर्व सोहळा संपन्न होणार आहे. सकल हिंदू समाज आणि सतपंथ ज्योत मंदिर यांच्या संयुक्त विद्यमाने ‘श्री महाविष्णू याग, श्री दशावतार मूर्ती प्राणप्रतिष्ठा महोत्सव आणि भव्य धर्म संमेलना’चे आयोजन करण्यात आले आहे. या निमित्ताने संपूर्ण धानोरा नगरी भक्तिमय झाली असून परिसरात उत्साहाचे वातावरण आहे.
२० एकर जागेत सोहळ्याची भव्यता..
या ऐतिहासिक सोहळ्यासाठी जागेची अडचण ग्रामस्थांच्या दातृत्वातून सुटली आहे. सूर्यवंशी गुजर समाज मंदिरासमोरील सुमारे २० एकर विस्तीर्ण जागेत हा सोहळा पार पडणार आहे. विशेष म्हणजे, स्थानिक शेतकरी बांधवांनी ही जागा कोणत्याही शुल्काशिवाय या धार्मिक कार्यासाठी उपलब्ध करून देऊन सामाजिक बांधिलकी जपली आहे.
ग्रामस्थांचे श्रमदान आणि नियोजन..
सोहळ्याची पूर्वतयारी सध्या युद्धपातळीवर सुरू आहे. मैदानाची स्वच्छता आणि मंडपाच्या उभारणीसाठी गावातील तरुण तसेच ज्येष्ठ नागरिक दररोज श्रमदान करत आहेत. दिवसा प्रत्यक्ष मैदानावर तयारी आणि रात्री परिसरातील गावांमध्ये जाऊन जनजागृती व प्रचार करण्यावर कार्यकर्त्यांनी भर दिला आहे. महामंडलेश्वर स्वामी श्री जनार्दन हरी महाराज यांच्या सूक्ष्म मार्गदर्शनाखाली यज्ञशाळा, मूर्ती प्राणप्रतिष्ठा विधी आणि धर्म संमेलनाचे शास्त्रोक्त नियोजन केले जात आहे.
जातिभेद विसरून गाव एकवटले..
या महोत्सवाचे सर्वात मोठे वैशिष्ट्य म्हणजे गावातील सर्व भेद विसरून संपूर्ण हिंदू समाज ‘एक गाव, एक परिवार’ या भावनेने एकत्र आला आहे. आयोजक म्हणून सकल हिंदू समाज महाराष्ट्र आणि निमंत्रक म्हणून सतपंथ ज्योत मंदिर, धानोरा या कार्यात अग्रभागी आहेत.
कार्यक्रमाची रूपरेषा खालीलप्रमाणे:
९ एप्रिल: हभप गोविंद महाराज गायकवाड (आळंदी) यांचा ‘भारूड’ कार्यक्रम.
१० एप्रिल: प्राणप्रतिष्ठा होणाऱ्या मूर्तींची भव्य ग्राम प्रदक्षिणा.
११ ते १३ एप्रिल: विश्वकल्याणासाठी ‘श्री महाविष्णू याग’ विधी.
१३ एप्रिल: महोत्सवाचा मुख्य सोहळा – ‘श्री दशावतार मूर्ती प्राणप्रतिष्ठा’.
१४ एप्रिल: विविध संप्रदायांच्या संत-महंतांच्या उपस्थितीत भव्य ‘धर्म संमेलन’.
हा सोहळा केवळ धार्मिक विधी नसून सामाजिक एकतेचे दर्शन घडवणारा ठरेल, असा विश्वास व्यक्त करत आयोजकांनी जास्तीत जास्त भाविकांनी उपस्थित राहण्याचे आवाहन केले आहे.
