जळगाव, (प्रतिनिधी) : उसनवारीचे पाच हजार रुपये देण्याच्या बहाण्याने बोलावून नाशिक येथील एका २८ वर्षीय महिला ब्युटीपार्लर चालकावर भरदुपारी कारमध्ये अत्याचार केल्याची धक्कादायक घटना समोर आली आहे. ही घटना २४ जून रोजी दुपारी १ वाजता सागर पार्कजवळ घडली. याप्रकरणी २७ जून रोजी रामानंद नगर पोलीस ठाण्यात आरोपी सुनील मधुकर चौधरी (रा. धरणगाव) याच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, नाशिक येथील पीडित महिला घटस्फोटीत असून, तिची गेल्या फेब्रुवारी महिन्यात सुनील चौधरी याच्याशी ओळख झाली होती. सुनीलने आपण प्रॉपर्टीचे काम करत असल्याचे सांगून तिचा मोबाईल क्रमांक घेतला व संपर्क वाढवला होता. २४ जून रोजी पीडित महिला जळगावात आली असता, सुनीलने तिला पाच हजार रुपये देतो असे सांगून सागर पार्कजवळ बोलावले.
त्यानंतर तिला एका कारमध्ये बसवून तिच्याकडे शरीरसुखाची मागणी केली. महिलेने त्यास नकार दिला असता, सुनीलने तिला जबर मारहाण केली आणि वाहनातच तिच्यावर बलात्कार केला.
कोणाला सांगितल्यास जीवे मारण्याची धमकी..
अत्याचार केल्यानंतर ‘हा प्रकार कोणाला सांगितला तर तुला पाहून घेईन’, अशी धमकी आरोपीने पीडितेला दिली. या भीतीपोटी घाबरलेल्या महिलेने तीन दिवस कोणाकडेही तक्रार केली नाही. मात्र, तिच्या एका मैत्रिणीने तिला धीर दिल्यानंतर २७ जून रोजी पीडित महिलेने जळगाव गाठून रामानंद नगर पोलीस ठाण्यात फिर्याद दिली. या तक्रारीवरून सुनील चौधरी याच्याविरुद्ध बलात्काराचा गुन्हा दाखल करण्यात आला असून, पुढील तपास पोलीस उपनिरीक्षक सचिन रणशेवरे करत आहेत.
