भुसावळ, (प्रतिनिधी) : शहरालगतच्या मिलिटरी स्टेशन कॅम्पस आणि झेडटीआरआय बोगद्याजवळ असलेल्या कालिका माता मंदिराचे पुजारी संतोष रघुवीर मंचल (वय ५५) यांची अज्ञात हल्लेखोरांनी डोक्यात जड वस्तूने प्रहार करून निर्घृण हत्या केली. सोमवारी (२९ जून) सकाळी १० वाजेच्या सुमारास हा धक्कादायक प्रकार उघडकीस आल्याने रेल्वे परिसर आणि भुसावळ शहरात खळबळ उडाली आहे.
मृत संतोष मंचल हे गेल्या ६ ते ७ वर्षांपासून मंदिराच्या आवारातील एका पत्राच्या खोलीत राहून पूजा-अर्चा व देखभाल करत असत. सोमवारी सकाळी एक नागरिक मंदिरात दर्शनासाठी गेला असता, त्याला संतोष मंचल रक्ताच्या थारोळ्यात मृत पडलेले आढळून आले. अज्ञात मारेकऱ्यांनी त्यांच्या डोक्यावर गंभीर वार करून त्यांना जागीच ठार केले होते. घटनेची माहिती मिळताच त्यांच्या कुटुंबाने घटनास्थळी एकच आक्रोश केला.
घटनेचे गांभीर्य ओळखून पोलीस अधीक्षक श्रीकांत धिवरे, उप पोलीस अधीक्षक केदार बारबोले यांच्यासह स्थानिक गुन्हे शाखा आणि भुसावळ शहर पोलिसांच्या पथकाने तातडीने घटनास्थळी धाव घेतली. जळगाव येथून ठसे तज्ज्ञ आणि फॉरेन्सिक लॅबच्या पथकाला पाचारण करून पुरावे गोळा करण्यात आले आहेत. मृतदेह उत्तरीय तपासणीसाठी पाठवण्यात आला असून भुसावळ शहर पोलीस ठाण्यात अज्ञात आरोपींविरुद्ध खुनाचा गुन्हा दाखल करण्यात आला आहे.
हा खून चोरीच्या उद्देशाने, जुन्या वैमनस्यातून की कौटुंबिक वादातून झाला, याचा तपास पोलीस करत आहेत. आरोपींच्या शोधासाठी एलसीबी आणि शहर पोलिसांची पथके रवाना करण्यात आली असून लवकरच या गुन्ह्याचा छडा लागेल, असा विश्वास पोलिसांनी व्यक्त केला आहे.
