जळगाव, (प्रतिनिधी) : राज्य शासनाने मंगळवारी प्रशासकीय पातळीवर मोठे फेरबदल करत चार आयएएस अधिकाऱ्यांच्या बदल्या केल्या आहेत. यामध्ये जळगाव महानगरपालिकेच्या आयुक्तपदी आयएएस अधिकारी आदित्य चंद्रभान जीवने यांची नियुक्ती करण्यात आली आहे.
नवनियुक्त आयुक्त आदित्य जीवने हे यापूर्वी छत्रपती संभाजीनगर येथे महावितरणचे सहव्यवस्थापकीय संचालक म्हणून कार्यरत होते. जीवने हे २०२१ च्या बॅचचे महाराष्ट्र केडरचे आयएएस अधिकारी असून, ते मूळचे चंद्रपूर जिल्ह्यातील वरोरा येथील रहिवासी आहेत. त्यांनी राष्ट्रसंत तुकडोजी महाराज नागपूर विद्यापीठातून मेकॅनिकल इंजिनिअरिंगमध्ये आपली पदवी पूर्ण केली आहे.
विशेष म्हणजे, जळगाव महानगरपालिकेच्या स्थापनेपासून महापालिकेला लाभलेले ते तिसरे आयएएस आयुक्त ठरले आहेत. दरम्यान, जळगाव महापालिकेचे मावळते आयुक्त ज्ञानेश्वर ढेरे यांची बदली करण्यात आली असून, त्यांना अद्याप नवीन पदस्थापना मिळालेली नाही.
