जळगाव, (प्रतिनिधी) : शेअर मार्केटमध्ये गुंतवणुकीच्या नावाखाली तब्बल २३ कोटी ८१ लाख रुपयांचा गंडा घालणाऱ्या TWY असोसिएट्स प्रा.लि. कंपनीचा जळगाव शाखा प्रमुख मिलिंद शालिकराव पाटील (वय ४१, रा. शिवकॉलनी, जळगाव) याला आर्थिक गुन्हे शाखेने अटक केली आहे. याप्रकरणी जिल्हापेठ पोलीस ठाण्यात गुन्हा दाखल करण्यात आला असून, संशयिताला आज न्यायालयात हजर करण्यात येणार आहे.
मिलींद पाटील याने पुणे येथील मुख्य संचालक समीर सुभाष नार्वेकर, नेहा समीर नार्वेकर व संकेश रामकृष्ण घाग यांच्याशी संगनमत करून जळगाव शहरात डिसेंबर २०२० ते सप्टेंबर २०२५ या कालावधीत कंपनीची फ्रँचायसी चालवली. गुंतवणूकदारांना शेअर मार्केट ट्रेनिंगची खोटी माहिती देऊन आणि जास्तीत जास्त परताव्याचे आमिष दाखवून २७९ गुंतवणूकदारांकडून २३,८१,७२,५३०/- रुपये जमा केले. मात्र, मुदत संपल्यानंतरही परतावा न देता या रकमेचा अपहार केला.
भरत रतीलाल पवार (रा. पाळधी) यांच्या फिर्यादीवरून मिलिंद पाटील व इतर संचालकांविरुद्ध जिल्हापेठ पोलीस ठाण्यात गु.र. नं. १६५/२०२६ अन्वये भारतीय न्याय संहिता व महाराष्ट्र अनियंत्रित ठेव योजना प्रतिबंध अधिनियमानुसार गुन्हा दाखल करण्यात आला आहे. पोलीस अधीक्षक श्रीकांत धिवरे यांच्या मार्गदर्शनाखाली आर्थिक गुन्हे शाखेने ही कारवाई केली आहे.
या कंपनीच्या संचालकांवर केवळ जळगावातच नव्हे, तर यवतमाळ, चिपळूण, खारघर, पुणे, ठाणे, नागपूर, रायगड आणि छत्रपती संभाजी नगर यांसारख्या शहरांतही फसवणुकीचे गुन्हे दाखल आहेत. मुख्य आरोपी समीर नार्वेकर व नेहा नार्वेकर यांना यापूर्वीच ठाणे पोलिसांनी अटक केली आहे.
जळगाव शाखेत ज्या गुंतवणूकदारांनी पैसे गुंतवून आपली फसवणूक झाली आहे, त्यांनी अधिक माहितीसाठी आर्थिक गुन्हे शाखा, जळगाव येथे संपर्क साधावा, असे आवाहन पोलीस प्रशासनाकडून करण्यात आले आहे.
