पाचोरा, (प्रतिनिधी) : चारित्र्यावर संशय घेऊन होणाऱ्या सततच्या मारहाणीला कंटाळून एका विवाहित महिलेने गळफास घेऊन आत्महत्या केल्याची धक्कादायक घटना पाचोरामधील गणपती नगर येथे घडली आहे. या प्रकरणी विवाहितेच्या वडिलांच्या तक्रारीवरून पतीविरोधात आत्महत्येसाठी प्रवृत्त केल्याचा गुन्हा दाखल करण्यात आला आहे.
माधुरी सोनवणे (वय अंदाजे २५) हिने सन २०२३ मध्ये विशाल सोनवणे याच्याशी प्रेमविवाह केला होता. लग्नानंतर विशाल हा माधुरीच्या चारित्र्यावर संशय घेत तिला वारंवार मारहाण करत होता. या जाचाला कंटाळून माधुरीने अखेर ३ ऑगस्ट रोजी रात्री ८ वाजता नंदनवन सिटी येथील आपल्या राहत्या घरात गळफास लावून जीवन संपवले.
मयत माधुरीचे वडील धनराज मिस्तरी यांनी पाचोरा पोलीस ठाण्यात विशाल सोनवणे विरोधात फिर्याद दिली आहे. या तक्रारीनुसार, विशालच्या छळामुळेच माधुरीने आत्महत्या केली असल्याचे नमूद करण्यात आले आहे. घटनेचा पुढील तपास पाचोरा पोलीस करत आहेत.
