जळगाव, प्रतिनिधी : काकांच्या अंत्यविधीसाठी गावी आलेल्या दिनेश ज्ञानेश्वर पाटील (वय २७, रा. धानोरा, ता. जळगाव) या तरुणाने राहत्या घरात गळफास घेऊन आत्महत्या केल्याची घटना ३ ऑक्टोबर रोजी धानोरा येथे घडली. याप्रकरणी जळगाव तालुका पोलिस ठाण्यात अकस्मात मृत्यूची नोंद करण्यात आली आहे.
दिनेश पाटील हा मूळचा धानोरा येथील रहिवासी असून, तो सुरत येथे कामाला होता. काकांचे निधन झाल्याने त्यांच्या अंत्यविधीसाठी तो गावी आला होता. शनिवारी त्याने राहत्या घरात गळफास घेतला. काही वेळाने त्याचा भाऊ त्याला बोलवण्यासाठी गेला असता दिनेश हा गळफास घेतलेल्या अवस्थेत आढळून आला.
कुटुंबीयांनी त्याला तातडीने शासकीय वैद्यकीय महाविद्यालय व रुग्णालयात दाखल केले. मात्र, वैद्यकीय अधिकाऱ्यांनी तपासणी करून त्याला मृत घोषित केले. दिनेशने आत्महत्या का केली, याचे कारण अद्याप स्पष्ट झालेले नाही. याप्रकरणी तालुका पोलिसांकडून पुढील तपास सुरू आहे.
