ट्रॅक्टरची दुचाकीला धडक; २२ वर्षीय तरुणाचा मृत्यू, दोघे गंभीर
चिंचोली-शेवगेपिंप्री मार्गावरील अपघात; जखमींवर उपचार सुरू
जामनेर | प्रतिनिधी
जामनेर तालुक्यातील फतेहपूरजवळ चिंचोली-शेवगेपिंप्री रस्त्यावर ट्रॅक्टर आणि दुचाकीमध्ये झालेल्या जोरदार धडकेत २२ वर्षीय तरुणाचा मृत्यू झाला. या दुर्घटनेत दुचाकीवरील अन्य दोघे गंभीर जखमी झाले. १८ ऑगस्ट रोजी सायंकाळी हा अपघात घडला.
मिळालेल्या माहितीनुसार, शेवगेपिंप्रीच्या दिशेने येणारा स्वराज कंपनीचा ट्रॅक्टर आणि चिंचोलीकडून गावाकडे जाणारी दुचाकी यांच्यात रस्त्यावर समोरासमोर धडक झाली. धडकेनंतर दुचाकीवरील रमजान भिकन तडवी (२२, रा. शेवगेपिंप्री) यांना गंभीर दुखापत झाली. उपचारादरम्यान त्यांचा मृत्यू झाला.
या दुर्घटनेत समीर अलाऊद्दीन तडवी (२२) आणि रहेमान गफूर तडवी (२५), दोघेही शेवगेपिंप्री येथील रहिवासी, गंभीर जखमी झाले आहेत. त्यांच्यावर रुग्णालयात उपचार सुरू आहेत.
दरम्यान, मृत रमजान तडवी यांच्या मृतदेहाचे जळगाव येथील सामान्य रुग्णालयात शवविच्छेदन करण्यात आले. त्यानंतर मृतदेह नातेवाईकांच्या ताब्यात देण्यात आला.
अपघाताचा पुढील तपास सहाय्यक पोलीस निरीक्षक अंकुश जाधव यांच्या मार्गदर्शनाखाली सुरू आहे
