जळगाव, (प्रतिनिधी) : शेतातील अवैध खोदकामाची तक्रार चौकशी बंद करण्यासाठी एक लाख रुपयांच्या लाचेची मागणी करून, तडजोडीअंती ५० हजार रुपये स्वीकारताना नशिराबाद भागाचे मंडळ अधिकारी मिलिंद प्रकाश देवरे (वय ३७) आणि एक खाजगी इसम सुरेंद्र प्रल्हाद अहिरे (वय ३९) यांना नाशिक लाचलुचपत प्रतिबंधक विभागाने रंगेहाथ पकडले आहे. ही कारवाई मंगळवार, १२ मे रोजी पिंप्राळा येथील तलाठी कार्यालयासमोर करण्यात आली.
तक्रारदाराच्या विरोधात स्थानिक रहिवाशांनी शेतात अवैध खोदकाम केल्याबाबत तहसील कार्यालयात तक्रार केली होती, जी नंतर मागे घेण्यात आली होती. मात्र, या अर्जाची चौकशी बंद करण्यासाठी मंडळ अधिकारी मिलिंद देवरे यांनी तक्रारदाराकडे १ लाख रुपयांची मागणी केली होती. अखेर ५० हजार रुपये देण्याचे ठरले. ही रक्कम खासगी इसम सुरेंद्र अहिरे याच्याकडे देण्यास सांगण्यात आले होते.
तक्रारदाराने याप्रकरणी नाशिक ‘एसीबी’कडे धाव घेतली. त्यानुसार, पोलीस निरीक्षक राहुलकुमार नाईक यांच्या पथकाने पिंप्राळा तलाठी कार्यालयाबाहेर सापळा रचला. लाचेची रक्कम स्वीकारताच दोन्ही आरोपींना ताब्यात घेण्यात आले. याप्रकरणी रामानंदनगर पोलीस ठाण्यात गुन्हा दाखल करण्याची प्रक्रिया सुरू आहे. ही कारवाई लाचलुचपत प्रतिबंधक विभाग, नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक माधव रेड्डी, सुनील दोरगे यांच्या मार्गदर्शनाखाली पोलीस निरीक्षक राहुलकुमार नाईक, हेमंत नागरे व पथकाने यशस्वी केली.
