जळगाव, (प्रतिनिधी) : शहरातील कालंका माता चौफुलीजवळ शुक्रवारी रात्री ८ वाजेच्या सुमारास एका भरधाव डंपरने पायी जाणाऱ्या हातमजुराला चिरडल्याची भीषण घटना घडली. प्रभाकर पाटील (वय ५५, रा. तेली चौक) असे मृताचे नाव असून, या अपघातानंतर संतप्त झालेल्या नागरिकांनी डंपरची तोडफोड करत महामार्गावर रास्तारोको केला.
प्रभाकर पाटील हे रात्री काम आटोपून भाजीपाला घेऊन पायी घराकडे परतत होते. कालंका माता चौफुलीजवळ डंपरने त्यांना जोरदार धडक दिली. या अपघातात ते चाकाखाली आल्याने त्यांचा जागीच मृत्यू झाला. त्यांच्या पश्चात पत्नी व दोन मुले असा परिवार आहे.
जमावाचा उद्रेक आणि पोलीस कारवाई..
अपघाताची बातमी समजताच स्थानिक नागरिकांनी घटनास्थळी मोठी गर्दी केली. संतप्त जमावाने डंपरवर दगडफेक करून काचा फोडल्या आणि रस्ता रोखून धरला. यामुळे महामार्गावरील वाहतूक सुमारे एक तास ठप्प झाली होती. एमआयडीसी आणि शनिपेठ पोलिसांनी तात्काळ धाव घेत जमावाची समजूत काढली आणि परिस्थिती नियंत्रणात आणली. पोलिसांनी डंपर ताब्यात घेतला असून चालकावर गुन्हा दाखल करण्याची प्रक्रिया रात्री सुरू होती.
घटनेनंतर आमदार सुरेश भोळे यांनी भेट देऊन नागरिकांच्या समस्या जाणून घेतल्या. याच ठिकाणी वर्षभरापूर्वी एका मुलीचाही बळी गेला होता. बायपास सुरू होऊनही शहरांतर्गत महामार्गावर अवजड वाहनांमुळे होणारे अपघात थांबत नसल्याने प्रशासनाविरुद्ध तीव्र संताप व्यक्त होत आहे.
