जामनेर, (प्रतिनिधी) : तालुक्यातील कसबा पिंप्री येथे दारूच्या व्यसनापायी कुटुंबाला त्रास देणाऱ्या २५ वर्षीय मुलाचा वडिलांनी डोक्यात दगड घालून खून केल्याची धक्कादायक घटना समोर आली आहे. याप्रकरणी स्थानिक गुन्हे शाखा आणि फत्तेपूर पोलिसांनी तिघांना अटक केली आहे.
कसबा पिंप्री येथील शुभम धनराज सुरडकर (वय २५) याचा मृतदेह गावापासून एक किलोमीटर अंतरावर शेख करीम शेख रऊफ यांच्या शेताच्या बांधावर रस्त्याच्या कडेला आढळून आला. सकाळी धावण्यासाठी गेलेल्या काही तरुणांना हा मृतदेह दिसला, त्यानंतर त्यांनी तात्काळ पोलीस पाटील समद तडवी यांना माहिती दिली. त्यांनी फत्तेपूर पोलिसांना या घटनेची माहिती दिली.
सहाय्यक पोलीस निरीक्षक अंकुश जाधव आपल्या सहकाऱ्यांसह घटनास्थळी पोहोचले. मृतदेहाची पाहणी केली असता, शुभमच्या डोक्यावर कठीण वस्तूने मारहाण झाल्याचे आणि मृतदेह नंतर येथे आणून टाकल्याचे प्राथमिक तपासात निष्पन्न झाले. एलसीबीने तपास सुरू करून शुभमच्या घरी धाव घेतली. पोलीस निरीक्षक संदीप पाटील यांनी घरातील चटई उचलल्यानंतर जमिनीवर रक्ताचे डाग आढळले. शुभमचे वडील धनराज सुपडू सुरडकर (वय ४५) यांना विश्वासात घेतल्यानंतर त्यांनी खुनाची कबुली दिली.
पोलिसांनी दिलेल्या माहितीनुसार, शुभमला दारूचे व्यसन होते आणि तो आई-वडील, भाऊ-बहीण आणि पत्नीला वारंवार त्रास देऊन भांडणे करत असे. त्याच्या त्रासाला कुटुंबीय कंटाळले होते, इतकेच नाही तर त्याची पत्नीही घर सोडून गेली होती. २१ जून रोजी रात्री शुभमने दारू पिऊन घरात पुन्हा वाद घातला आणि हाताने काच फोडला. शुभम घरात झोपलेला असताना, वडील धनराज यांनी रागाच्या भरात त्याच्या डोक्यात मोठा दगड टाकला. खुनानंतर, धनराज यांनी मुलाचा मृतदेह हलवण्यासाठी आपला दुसरा मुलगा गौरव धनराज सुरडकर आणि भाऊ हिरालाल सुपडू सुरडकर यांना बोलावून घेतले. तिघांनी मिळून शुभमचा मृतदेह त्यांच्या चारचाकी वाहनातून पिंपळगाव चौखांबे गावाच्या रस्त्यावर टाकून दिला आणि घरी परत आले.
या घटनेमुळे तालुक्यात खळबळ उडाली आहे. संशयित आरोपींना फत्तेपूर पोलीस ठाण्यात ताब्यात देण्यात आले आहे. पोलीस अधीक्षक डाॅ. महेश्वर रेड्डी, अपर पोलीस अधीक्षक कविता नेरकर (चाळीसगाव परिमंडळ) आणि उपविभागीय पोलीस अधिकारी धनंजय येरुळे (पाचोरा उपविभाग) यांच्या सूचना व मार्गदर्शनाखाली ही कारवाई करण्यात आली आहे. स्थानिक गुन्हे शाखेचे पोलीस निरीक्षक संदीप पाटील, फत्तेपूर पोलीस स्टेशनचे प्रभारी अधिकारी अंकुश जाधव, पोलीस उपनिरीक्षक शेखर डोमाळे आणि इतर पोलीस अंमलदारांनी या कारवाईत सहभाग घेतला. पुढील तपास फत्तेपूर पोलीस स्टेशनचे प्रभारी अधिकारी अंकुश जाधव करत आहेत.
