जळगाव, (प्रतिनिधी) : घरकुलाचा दुसरा हप्ता मिळवून देण्यासाठी आणि गट नंबर नमुना आठ देण्यासाठी सहा हजार रुपयांची लाच मागणाऱ्या ग्रामसेवकासह एका रोजगार सेवकाला जळगाव लाचलुचपत प्रतिबंधक विभागाने सोमवारी २३ जून रोजी रंगेहात पकडले. मांडकी, ता. भडगाव येथील रहिवासी असलेल्या ३५ वर्षीय तक्रारदाराकडून ५ हजार रुपये स्वीकारताना ही कारवाई करण्यात आली.
काय आहे प्रकरण?
मांडकी, ता. भडगाव येथील एका व्यक्तीला मंजूर झालेल्या घरकुलाचा दुसरा हप्ता मिळावा यासाठी तसेच गट नंबर नमुना आठ मिळवण्यासाठी ग्रामसेवक सोनिराम धनराज शिरसाठ (वय ४७, रा. पाचोरा, जि. जळगाव) आणि रोजगार सेवक जितेंद्र लक्ष्मण चौधरी (वय ३८, रा. पाचोरा, जि. जळगाव) यांनी ६ हजार रुपयांची मागणी केली होती. याबाबत तक्रारदाराने २३ जून २०२५ रोजी लाचलुचपत प्रतिबंधक विभागाकडे तक्रार दिली होती.
सापळा रचून केली कारवाई..
तक्रार मिळाल्यानंतर लाचलुचपत प्रतिबंधक विभागाने पडताळणी केली असता, आरोपींनी ६ हजार रुपयांची मागणी करून तडजोडीअंती ५ हजार रुपये लाच स्वीकारण्याची तयारी दर्शवली. त्यानुसार, २३ जून २०२५ रोजी सापळा रचण्यात आला. या सापळा कारवाईदरम्यान, आरोपी ग्रामसेवक सोनिराम शिरसाठ आणि रोजगार सेवक जितेंद्र चौधरी यांनी पंचांसमक्ष ५ हजार रुपयांची लाच स्वीकारताना रंगेहात पकडण्यात आले. त्यांच्याकडून लाचेची रक्कम ५ हजार रुपये हस्तगत करण्यात आली आहे. आरोपींना ताब्यात घेण्यात आले असून, पाचोरा पोलीस ठाण्यात गुन्हा दाखल करण्याची प्रक्रिया सुरू आहे.
ला.प्र.विभागाच्या नाशिक परिक्षेत्र, पोलीस अधीक्षक शर्मिष्ठा घारगे-वालावलकर यांच्या मार्गदर्शनाखाली या कारवाईचे पर्यवेक्षण पोलिस उप अधीक्षक योगेश ठाकूर (ला.प्र.वि. जळगाव) यांनी केले. सापळा अधिकारी म्हणून पोलीस निरीक्षक नेहा सूर्यवंशी (नंदुरबार) आणि तपास अधिकारी म्हणून पोलीस निरीक्षक नेत्रा जाधव (जळगाव) यांनी काम पाहिले. सापळा पथकात सहाय्यक पोलीस उपनिरीक्षक दिनेश सिंग पाटील, सहाय्यक पोलीस उपनिरीक्षक विलास पाटील, पोलीस नाईक हेमंत पाटील, पोलीस नाईक सुभाष पावरा यांचा सहभाग होता.
