जळगाव तालुक्यातील कडगाव येथील घटना
जळगाव (प्रतिनिधी) : पुलाच्या बांधकामासाठी केलेल्या खड्ड्यात बुडून एका शेतकऱ्याचा दुर्दैवी मृत्यू झाल्याची घटना तालुक्यातील कडगाव ते जोगलखेडा रस्त्यावर मंगळवारी दिनांक २७ ऑगस्ट रोजी सायंकाळी ६.३० वाजेच्या सुमारास समोर आली आहे. याबाबत नशिराबाद पोलीस ठाण्यात अकस्मात मृत्यूची नोंद करण्यात आली आहे.
संतोष यादव धनगर (वय-५५,रा.कडगाव ता. जळगाव) असे मयत शेतकऱ्याचे नाव आहे. तालुक्यातील कडगाव येथे संतोष धनगर हे पत्नी आणि मुलासह वास्तव्याला होते. शेतीकाम व पशुपालन करून ते उदरनिर्वाह करत होते. नेहमीप्रमाणे मंगळवारी दुपारी ते म्हशी चारण्यासाठी गेले होते. त्यानंतर सायंकाळी परत येत असताना जोगलखेडा ते कडगाव रस्त्यावरील पुलाचे काम करण्यासाठी केलेल्या खड्ड्यात त्यांच्या म्हशी गेल्या होत्या.
पाण्यात गेलेल्या म्हशी या गाळात बसल्याने त्यांना काढण्यासाठी संतोष धनगर हे गेले असता ते देखील गाळात फसले. दरम्यान घरी म्हशी काही परत आल्या. पण वडील घरी आले नाही. म्हणून मुलाने शोधाशोध केली तेव्हा त्यांना गाळामध्ये संतोष धनगर यांनी सोबत नेलेली पाण्याची बाटली दिसून आली. त्यावरून त्यांना गाळात असल्याचा अंदाज आला.
गावातील ग्रामस्थ एकत्र येऊन संतोष धनगर यांना खड्ड्यातील पाण्यातून बाहेर काढले. यावेळी संबंधित ठेकेदाराने हे काम अपूर्ण ठेवल्यामुळे एकच संताप व्यक्त केला होता. या घटनेबाबत नशिराबाद पोलीस ठाण्यात अकस्मात मृत्यूची नोंद करण्यात आली आहे. मयताच्या पश्चात पत्नी मालती, मुलगा जयेश असा परिवार आहे. या घटनेमुळे परिसरात हळहळ व्यक्त केली जात आहे.
