जळगाव, दि.२३ – रुग्णसेवा हिच ईश्वरसेवा हे ब्रिद घेऊन गोदावरी फाऊंडेशन संचलित डॉ.उल्हास पाटील रुग्णालय जळगाव जिल्ह्यासह बुलढाणा जिल्ह्यातील गावोगावी तज्ञ डॉक्टरांच्या चमूद्वारे पोहोचत आहे. खेड्यापाड्यात घेण्यात येत असलेल्या शिबिराद्वारे नागरिकांची मोफत आरोग्य तपासणी केली जात असून अनेकांना गंभीर आजाराची लक्षणे दिसत असल्याने त्यांना पुढील उपचारासाठी रुग्णालयात येण्याचा सल्ल्यासह येण्यासाठी गाडीचीही व्यवस्था उपलब्ध करुन दिली जात आहे. दरम्यान मंगळवारी यावल तालुक्यातील कासारखेडा, भादली आणि मोहाडी येथे एकाचदिवशी मोफत आरोग्य तपासणी शिबिर घेण्यात आले.
सुप्रिम कॉलनीतील शिबिराचा ११३ नागरिकांना लाभ..
जळगाव येथील सुप्रिम कॉलनीतील शिवाजी महाराज चौकात सोमवारी डॉ.उल्हास पाटील रुग्णालयातर्फे मोफत आरोग्य तपासणी शिबिर घेण्यात आले. यावेळी मुधमेह, रक्तदाब, टू डी इको तपासणी अगदी मोफत करण्यात आली. याप्रसंगी मेडिसीन तज्ञ डॉ.तेजस कोटेचा, सर्जरीचे डॉ.अनिश जोशी, डॉ.कल्पना देशमुख, इंटर्न हर्षल राणे, सिद्धार्थ सिंग, आकाशे रेंगे यांनी आलेल्या रुग्णांच्या समस्या जाणून घेत योग्य ते मार्गदर्शन केले.
शिबिरासाठी नर्सिंग स्टाफचेही सहकार्य लाभले असून शिबिरात ११३ नागरिकांनी लाभ घेतला असून ४२ रुग्णांना पुढील उपचारासाठी रुग्णालयात येण्याचा सल्ला देण्यात आला आहे. शिबिर यशस्वीतेसाठी मार्केटिंगचे रत्नशेखर जैन, टि.व्ही.पाटील, मकरंद महाजन, विशाल शेजवळ यांचे सहकार्य लाभले.
कासारखेड्यातील शिबिरांचा ग्रामस्थांना लाभ..
यावल तालुक्यातील कासारखेडा येथील श्री संत तुकाराम महाराज मंदिर परिसरात मंगळवारी महाआरोग्य शिबिर घेण्यात आले. आरोग्य शिबिराचे उद्घाटन माजी आ. रमेश विठ्ठल चौधरी, यावल-रावेर काँग्रेसचे गटनेते शेखर सोपान पाटील, चिंचोलीचे अनिल साठे यांच्याहस्ते करण्यात आले. यावेळी आर.जी.पाटील, उमाकांत रामराव पाटील, अनिल दंगल पाटील यांची विशेष उपस्थीती होती.
निशुल्क अस्थिरोग शिबिरामुळे भादलीकरांना दिलासा..
भादली येथे मंगळवारी निशुल्क अस्थिरोग निदान शिबिराला सुरुवात झाली. यात गुडघे दुखणे, पोटर्या दुखणे, सांधे दुखणे आदी हाडांसंबंधित विकारांवर डॉ.उल्हास पाटील रुग्णालयातील अस्थिरोग तज्ञ डॉ.परिक्षीत पाटील यांनी मार्गदर्शन केले तसेच रुग्णांची तपासणीसुद्धा केली. या निशुल्क शिबिरामुळे भादलीकरांना दिलासा मिळाला आहे. शिबिर यशस्वीतेसाठी टि व्ही पाटील, मकरंद महाजन यांनी प्रयत्न केले.
मोहाडीतील महिलांना स्त्रीरोग निदान शिबिराचा लाभ..
मासिक पाळीत वेदना होणे, अंगावरुन अतिप्रमाणात पांढरे पाणी जाणे, पोटदुखी, वंध्यत्व आदि प्रकारच्या स्त्रियांच्या आजाराचे निदान शिबिर मंगळवारी मोहाडी येथे घेण्यात आले. सुप्रसिद्ध स्त्रीरोग तज्ञ डॉ.माया आर्विकर, रेसिडेंट डॉ.महेश देशमुख यांनी महिलांच्या आरोग्याची तपासणी केली. यात महिलांनी महिलाच डॉक्टर असल्याने निसंकोचपणे समस्या सांगितल्यात, त्या जाणून घेत औषधोपचार आणि रुग्णालयात येवून काही तपासण्या करुन घेण्याचा सल्ला देण्यात आला. या शिबिराचा ७६ महिलांनी लाभ घेतला. या शिबिरासाठी रवि तायडे यांनी परिश्रम घेतले. याशिवाय २४ मार्च रोजी कोरपावली, २५ मार्चला संग्रामपूर तालुक्यातील कवठळ, अमळनेर याठिकाणी मोफत आरोग्य शिबिराचे आयोजन करण्यात आले आहे.
