जळगाव, दि.२३ – शहराकडून मोहाडीकडे जाणाऱ्या रस्त्यावर लांडोर खोरी उद्यानाच्यापुढे एका ट्रकच्या चाकाखाली आल्याने शाळकरी विद्यार्थ्याचा जागीच मृत्यू झाल्याची घटना बुधवारी घडलीयं. दरम्यान घटनेनंतर संतप्त झालेल्या नागरिकांनी ट्रकवर दगडफेक केली.
मोहाडी येथील सुजय गणेश सोनवणे हा सेंट टेरेसा शाळेत नेहमीप्रमाणे गेलेला होता. शाळेतून त्याला दुचाकी क्रमांक एमएच.१९.डीएम.१११ ने राजू गवळी हा घेऊन येत होता. दरम्यान लांडोरखोरी उद्यानाच्या पुढे उतरती मार्गावर समोरून येणाऱ्या ट्रक क्रमांक एमएच.२८.बी.७७०३ हा आरटीओ ट्रॅकहून परतत होता. उतावर ट्रकच्या चाकाखाली आल्याने सुजय सोनवणे याचा जागीच मृत्यू झाला.
यावेळी अपघातानंतर ट्रक चालकाने लागलीच पळ काढला. सुजय मोहाडी येथील रहिवासी असल्याने संतप्त नागरिकांनी ट्रकवर दगडफेक केली. मृत सुजयच्या नातेवाईकांनी जिल्हा रुग्णालयात एकच आक्रोश केला.
