जळगाव, (प्रतिनिधी) : पाचोरा शहरात ५०० रुपयांच्या स्टॅम्प पेपरसाठी जादा रकमेची मागणी करून ५०० रुपयांची लाच स्वीकारताना एका अधिकृत स्टॅम्प वेंडरसह त्याच्या भावाला जळगाव लाचलुचपत प्रतिबंधक विभागाने (ACB) रंगेहात पकडले. ही कारवाई १७ मार्च २०२६ रोजी करण्यात आली असून, या घटनेमुळे महसूल विभागात मोठी खळबळ उडाली आहे.
मिळालेल्या माहितीनुसार, तक्रारदाराला ५०० रुपये दराचे १० स्टॅम्प पेपर हवे होते. शासकीय नियमानुसार त्याची एकूण किंमत ५,००० रुपये होणे अपेक्षित होते. मात्र, पाचोरा येथील जामनेर-पाचोरा रोडवरील प्रशांत झेरॉक्स सेंटरचे अधिकृत स्टॅम्प वेंडर योगेश ईश्वरलाल संघवी (वय ४९) यांनी तक्रारदाराकडे ५,५०० रुपयांची मागणी केली. म्हणजेच प्रत्येक स्टॅम्पमागे ५० रुपये याप्रमाणे एकूण ५०० रुपये अधिकची लाच मागितली. तक्रारदाराने जादा पैसे देण्यास नकार दिला असता, संघवी यांनी पैसे दिल्याशिवाय स्टॅम्प मिळणार नाही असे स्पष्ट सांगितले. अखेर नाईलाजास्तव तक्रारदाराने जळगाव लाचलुचपत प्रतिबंधक विभागाकडे धाव घेऊन तक्रार नोंदवली.
तक्रारीची शहानिशा केल्यानंतर, एसीबीच्या पथकाने १७ मार्च रोजी सापळा रचला. यावेळी योगेश संघवी याने लाचेच्या ५०० रुपयांच्या रकमेची मागणी केली आणि ही रक्कम त्याचे भाऊ प्रशांत ईश्वरलाल संघवी (वय ५३) यांनी स्वीकारली. पैसे स्वीकारताच दबा धरून बसलेल्या एसीबीच्या पथकाने दोघांना ताब्यात घेतले.
याप्रकरणी पाचोरा पोलीस ठाण्यात भ्रष्टाचार प्रतिबंधक अधिनियमा प्रमाणे गुन्हा दाखल करण्यात आला आहे. ही कारवाई लाचलुचपत प्रतिबंधक विभाग नाशिक परिक्षेत्राचे पोलीस अधीक्षक शर्मिष्ठा वालावलकर, अपर पोलीस अधीक्षक माधव रेड्डी यांच्या मार्गदर्शनाखाली जळगाव एसीबीचे पोलीस उपअधीक्षक योगेश ठाकूर, पोलीस निरीक्षक हेमंत नागरे, बाळू मराठे, भूषण पाटील यांच्या पथकाने यशस्वीरित्या पार पाडली.
महत्वाचे आवाहन:
कोणत्याही शासकीय कामासाठी कोणाही लोकसेवकाने किंवा त्यांच्या वतीने खासगी व्यक्तीने लाचेची मागणी केल्यास टोल फ्री क्रमांक १०६४ किंवा लाचलुचपत प्रतिबंधक विभाग, जळगाव कार्यालयाशी संपर्क साधावा, असे आवाहन प्रशासनाकडून करण्यात आले आहे.
