जळगाव, (प्रतिनिधी) : अमळनेर येथील एका व्यापाऱ्याच्या डोळ्यात मिरची पूड फेकून भरदिवसा ५ लाख २७ हजार रुपये लुटणाऱ्या आंतरजिल्हा टोळीचा जळगाव स्थानिक गुन्हे शाखेने पर्दाफाश केला आहे. या प्रकरणी पोलिसांनी धुळे येथील एका सराईत गुन्हेगाराला शिताफीने अटक केली असून, त्याच्याकडून दीड लाख रुपयांची रोख रक्कम हस्तगत करण्यात आली आहे.
दिनांक २५ फेब्रुवारी २०२६ रोजी सकाळी १०:४५ च्या सुमारास अमळनेर येथील ‘लामा जिनिंग’चे मालक यतिन विनोद कोठारी हे आपल्या दुचाकीवरून ५ लाख २७ हजार रुपयांची रोकड घेऊन जात होते. पिंपळे रोडवर तिघा अज्ञात इसमांनी त्यांना अडवून, डोळ्यात मिरची पूड फेकली आणि त्यांच्याकडील बॅग जबरदस्तीने हिसकावून पोबारा केला होता. या प्रकरणी अमळनेर पोलीस ठाण्यात गुन्हा दाखल करण्यात आला होता.
घटनेचे गांभीर्य ओळखून पोलीस अधीक्षक महेश्वर रेड्डी यांनी समांतर तपासाचे आदेश दिले होते. स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांच्या मार्गदर्शनाखाली पोलीस उपनिरीक्षक जितेंद्र वल्टे आणि त्यांच्या पथकाने तांत्रिक विश्लेषण व गोपनीय बातमीदारांच्या मदतीने तपासचक्र फिरवली. या तपासात सदर गुन्हा धुळ्यातील सराईत गुन्हेगार मनोज ऊर्फ खुशाल अशोक मोकळ याने केल्याचे निष्पन्न झाले. पोलिसांनी सापळा रचून त्याला ताब्यात घेतले असता, त्याने गुन्ह्याची कबुली दिली.
अटक करण्यात आलेला मनोज मोकळ (वय २६, रा. दंडेवाला नगर, मोहाडी, जि. धुळे) हा रेकॉर्डवरील सराईत गुन्हेगार आहे. यापूर्वी २०२१ मध्ये त्याने जळगाव शहरातील पंचमुखी हनुमान मंदिर परिसरात बंदुकीचा धाक दाखवून १५ लाख रुपयांची बॅग लंपास केली होती. विशेष म्हणजे, त्यावेळेस देखील एल.सी.बी.नेच त्याला बेड्या ठोकल्या होत्या.
ही यशस्वी कामगिरी पोलीस अधीक्षक महेश्वर रेड्डी, अपर पोलीस अधीक्षक कविता नेरकर यांच्या मार्गदर्शनाखाली वरिष्ठ पोलीस निरीक्षक राहुल गायकवाड, उपनिरीक्षक जितेंद्र वल्टे, संदीप पाटील, हरिलाल पाटील, प्रविण मांडोळे, राहुल कोळी, दीपक चौधरी, गौरव पाटील आणि मिलिंद जाधव यांच्या पथकाने केली. सध्या फरार असलेल्या इतर दोन आरोपींचा शोध युद्धपातळीवर सुरू असून, पुढील तपास अमळनेर पोलीस स्टेशनचे पोलीस निरीक्षक दत्तात्रय निकम व उपनिरीक्षक शरद काकळीज करत आहेत.
