भडगाव, प्रतिनिधी : भडगाव तालुक्यात अल्पवयीन मुलीचा विवाह झाल्यानंतर तिचे लैंगिक शोषण झाल्याचा गंभीर प्रकार समोर आला आहे. अवघ्या १७ वर्षे ४ महिन्यांच्या विवाहितेने बालिकेला जन्म दिल्यानंतर हे प्रकरण उघडकीस आले. याप्रकरणी पीडितेच्या पतीविरुद्ध भडगाव पोलीस ठाण्यात गुन्हा दाखल करण्यात आला आहे.
पोलिसांच्या माहितीनुसार, पीडितेचा विवाह ती अल्पवयीन असताना झाला होता. विवाहानंतर पतीने वारंवार शारीरिक संबंध ठेवल्याचा आरोप तिने तक्रारीत केला आहे. या संबंधातून ती गर्भवती राहिली होती.
२९ ऑक्टोबर २०२६ रोजी प्रसूतीवेदना सुरू झाल्यानंतर पीडितेला उपचारासाठी रुग्णालयात दाखल करण्यात आले. तेथे तिने एका बालिकेला जन्म दिला. या घटनेनंतर प्रकरण समोर आले आणि पोलिसांत तक्रार दाखल करण्यात आली.
पीडितेच्या तक्रारीवरून भडगाव पोलीस ठाण्यात भारतीय न्याय संहिता, बालकांचे लैंगिक अपराधांपासून संरक्षण (पोक्सो) अधिनियम तसेच बालविवाह प्रतिबंधक अधिनियमांतर्गत गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक सुशील सोनवणे करीत आहेत.
