जळगाव, (प्रतिनिधी) : एम.आय.डी.सी. पोलीस ठाण्याच्या हद्दीतून चोरीला गेलेल्या दोन मोटार सायकलींचा छडा लावण्यात पोलिसांना यश आले असून एका २४ वर्षीय चोरट्याला अटक करण्यात आली आहे. त्याच्याकडून ४५ हजार रुपये किमतीच्या दोन दुचाकी हस्तगत करण्यात आल्या आहेत.
मिळालेल्या माहितीनुसार, दि. २६ जुलै रोजी रात्री ११.३० ते दि. २७ जुलै रोजी सकाळी ६.०० वाजेच्या सुमारास फिर्यादी समीर खान नईम खान (रा. दत्त नगर मेहरुण, रवी किराणाजवळ, जळगाव) आणि साक्षीदार फारुख इकबाल बागवान (रा. शेरा चौक, जळगाव) यांच्या राहत्या घरासमोरून लावलेल्या मोटार सायकली अज्ञात चोरट्याने लांबविल्या होत्या. याप्रकरणी एम.आय.डी.सी. पोलीस ठाण्यात गुन्हा दाखल करण्यात आला होता.
गुन्ह्याचे गांभीर्य ओळखून पोलीस निरीक्षक बबन आव्हाड यांच्या मार्गदर्शनाखाली पो.हे.कॉ. रमेश चौधरी, प्रदीप चौधरी, पो.कॉ. नितीन ठाकूर, पो.कॉ. गणेश ठाकरे, पो.कॉ. किरण पाटील, पो.कॉ. राहुल घेटे, पो.कॉ. योगेश घुगे आणि पो.कॉ. सुभाष सावळे यांचे विशेष पथक तयार करण्यात आले.
तपास पथकाने तात्काळ घटनास्थळी भेट देऊन तांत्रिक विश्लेषण व गुप्त बातमीदारांमार्फत संशयिताची ओळख पटवली. २८ जुलै रोजी तांबापुरा मेहरुण भागात सापळा रचून संशयित आरोपी साहील मोहम्मद तडवी (वय २३, रा. तांबापुरा मच्छी बाजार, जळगाव) यास ताब्यात घेण्यात आले. चौकशीदरम्यान त्याने दोन्ही मोटार सायकली चोरी केल्याची कबुली दिल्याने त्यास तात्काळ अटक करण्यात आली.
अटक करण्यात आलेल्या आरोपीस न्यायालयात हजर केले असता १४ दिवसांची न्यायलयीन कोठडी सुनावण्यात आली आहे. या गुन्ह्याचा पुढील तपास पो.ना. प्रदीप चौधरी करत आहेत. सदरची कामगिरी पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे आणि एम.आय.डी.सी. पोलीस ठाण्याचे पोलीस निरीक्षक बबन आव्हाड यांच्या मार्गदर्शनाखाली पार पडली.
