जळगाव, (प्रतिनिधी) : शहरातील शिवाजीनगर भागात झालेल्या घरफोडीचा गुन्हा जळगाव शहर पोलीस स्टेशनच्या गुन्हे शोध पथकाने अवघ्या ५ तासांत उघडकीस आणला आहे. याप्रकरणी दोन सराईत चोरट्यांना अटक करून त्यांच्याकडून चोरीला गेलेला ६३,००० रुपये किमतीचा मुद्देमाल हस्तगत करण्यात पोलिसांना यश आले आहे.
शिवाजीनगर येथील रहिवासी सुशील भाईलाल भावसार यांच्या घरातून २५ जूनच्या रात्री ते २६ जून २०२६ च्या सकाळदरम्यान चोरट्यांनी ४२ हजार रुपये किमतीचा डेल कंपनीचा लॅपटॉप, १५ हजारांचा नोकिया अँड्रॉइड मोबाईल, सॅमसंग मोबाईल, २ किलो वजनाची पितळी कळशी आणि ३ हजार रुपयांची रोख रक्कम असा एकूण ६३ हजारांचा मुद्देमाल लंपास केला होता. याप्रकरणी जळगाव शहर पोलीस स्टेशनला गुन्हा दाखल करण्यात आला होता.
गुन्हा दाखल होताच पोलीस अधीक्षक श्रीकांत धिवरे, अप्पर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली पोलीस निरीक्षक सागर शिंपी व गुन्हे शोध पथकाने तात्काळ तपासाची चक्रे फिरवली. गोपनीय बातमीदाराकडून मिळालेल्या माहितीच्या आधारे पथकाने सराईत गुन्हेगार राफत शेख फिरोज (वय २०, रा. गेंदालाल मिल, जळगाव) आणि शेख शारीम शेख मुसेफ उर्फ मुसाब (वय २०, रा. सिंहगड, शिवाजीनगर हुडको, जळगाव) यांना ताब्यात घेतले. त्यांची कसून चौकशी केली असता, त्यांनी चोरीची कबुली दिली. पोलिसांनी आरोपींच्या घरातून लॅपटॉप, मोबाईल, पितळी कळशी आणि रोख रकमेसह संपूर्ण मुद्देमाल जप्त केला आहे.
ही यशस्वी कारवाई जळगाव शहर पोलीस स्टेशनचे पोलीस निरीक्षक सागर शिंपी यांच्या नेतृत्वाखाली गुन्हे शोध पथकातील सफौ. सुनिल पाटील, सफौ. दिपक शिरसाट, पोहेकाँ. उमेश भांडारकर, पोहेकाँ. सतिष पाटील, पोहेकाँ. विरेन्द्र शिंदे, पोहेकाँ. योगेश पाटील, पोहेकाँ. नंदलाल पाटील, पोहेकाँ. भगवान पाटील, पोकाँ. अमोल ठाकुर, पोकाँ. राहुलकुमार पांचाळ, पोकाँ. प्रणय पवार व पोकाँ. भगवान मोरे यांच्या पथकाने केली. पोलिसांच्या या कामगिरीचे सर्वत्र कौतुक होत आहे.
