जळगाव, (प्रतिनिधी) : नशिराबाद बस स्थानक परिसरात दहशत माजवणाऱ्या एका सराईत गुन्हेगाराला जळगाव जिल्हा पोलिसांनी सापळा रचून अटक केली आहे. त्याच्याकडून एक लोखंडी बनावटीचा गावठी कट्टा जप्त करण्यात आला असून, या कारवाईमुळे परिसरात खळबळ उडाली आहे.
दि.१९ एप्रिल २०२६ रोजी सहाय्यक पोलीस निरीक्षक योगिता नारखेडे यांना गोपनीय माहिती मिळाली होती की, नशिराबाद गावातील बस स्थानक परिसरात एक इसम बेकायदेशीर हत्यारासह फिरत असून लोकांमध्ये दहशत निर्माण करत आहे. या माहितीची गांभीर्याने दखल घेत पोलिसांनी तात्काळ कारवाईचे नियोजन केले.
मिळालेल्या आदेशानुसार, पोलीस पथकाने सायंकाळी बस स्थानक परिसरात अचानक छापा टाकला. यावेळी संशयित आरोपी कमलाकर प्रभाकर महाजन (वय ३६, रा. वरची अळी, नशिराबाद) याला जागीच ताब्यात घेण्यात आले. त्याची झडती घेतली असता, त्याच्याकडे लोखंडी चंदेरी रंगाचा व काळ्या रंगाची प्लास्टिक मूठ असलेला एक गावठी कट्टा मिळून आला. पोलिसांनी तो कट्टा तात्काळ जप्त केला आहे.
याप्रकरणी नशिराबाद पोलीस स्टेशनमध्ये आरोपीविरुद्ध गुन्हा दाखल करण्यात आला आहे. या प्रकरणाचा पुढील तपास पोलीस हेड कॉन्स्टेबल राजेंद्र ठाकरे करत आहेत. धडक कारवाई पथकात सहाय्यक पोलीस निरीक्षक योगिता नारखेडे यांच्यासह पोलीस उपनिरीक्षक हरेश पाटील, चंद्रकांत पाटील, गुणवंत देशमुख, भरत बाविस्कर, पंकज सोनवणे, सागर बिडे, प्रवीण लोहार आणि समीर सैय्यद या कर्मचाऱ्यांचा समावेश होता.
