जळगाव, (प्रतिनिधी) : राज्यातील सनदी अधिकाऱ्यांच्या बदल्यांचा धडाका सुरू असतानाच, आता पोलीस दलातही मोठे फेरबदल करण्यात आले आहेत. राज्याचे मुख्यमंत्री तथा गृहमंत्री देवेंद्र फडणवीस यांनी राज्यातील ९ जिल्हा पोलीस अधीक्षकांच्या बदल्यांचे आदेश निर्गमित केले आहेत. या महत्त्वपूर्ण निर्णयांतर्गत जळगाव जिल्ह्याचे पोलीस अधीक्षक डॉ. महेश्वर रेड्डी यांची बदली करण्यात आली असून, त्यांच्या जागी धुळ्याचे पोलीस अधीक्षक श्रीकांत ढिवरे यांची जळगावचे नवे जिल्हा पोलीस अधीक्षक म्हणून नियुक्ती करण्यात आली आहे.
नूतन पोलीस अधीक्षक श्रीकांत ढिवरे हे अनुभवी आयपीएस अधिकारी म्हणून ओळखले जातात. धुळे जिल्ह्यात पोलीस अधीक्षक म्हणून काम करताना त्यांनी आपल्या कार्यशैलीचा ठसा उमटवला आहे. जळगाव जिल्ह्याचा विस्तार आणि गुन्हेगारीचे स्वरूप लक्षात घेता, ढिवरे यांच्या अनुभवाचा जिल्ह्याला मोठा फायदा होईल आणि पोलीस प्रशासन अधिक सक्षम होईल, अशी अपेक्षा व्यक्त केली जात आहे.
जळगावचे मावळते पोलीस अधीक्षक डॉ. महेश्वर रेड्डी यांची पुणे येथे राज्य गुन्हे अन्वेषण विभागात (CID) पोलीस अधीक्षक पदावर बदली करण्यात आली आहे. त्यांच्या कार्यकाळात त्यांनी जिल्ह्यातील कायदा व सुव्यवस्था राखण्यासाठी महत्त्वपूर्ण पावले उचलली होती. जळगावच्या नूतन अधीक्षकांच्या आगामी कार्यकाळाकडे आता सर्वांचे लक्ष लागले आहे. श्रीकांत ढिवरे लवकरच आपला पदभार स्वीकारणार असल्याची माहिती सूत्रांकडून मिळाली आहे.
