जळगाव, (प्रतिनिधी) : संत ज्ञानेश्वर विद्यालयात समाजसुधारक महात्मा ज्योतिबा फुले यांच्या पुण्यतिथीनिमित्त मुख्याध्यापक मुकेश नाईक यांच्या संकल्पनेतून विद्यार्थ्यांसाठी एक तास विशेष ‘इंग्रजी वाचन उपक्रम’ उत्साहात राबविण्यात आला. सर्वांना शिक्षणाचा अधिकार मिळवून देण्यासाठी आयुष्यभर लढणाऱ्या महात्मा फुले यांच्या कार्याची ओळख विद्यार्थ्यांना करून देणे, हा या उपक्रमाचा मुख्य उद्देश होता.
कार्यक्रमाची सुरुवात इयत्ता दहावीतील विद्यार्थ्यांनी महात्मा फुले यांच्या चरित्रातील प्रेरणादायी परिच्छेदाचे वाचन करून केली. यात तरन्नूम मुस्ताक तडवी, रोशन तुषार पाथरवट, तेजस्विनी संभाजी दांडगे, आरोही सतीश सोनार, कावेरी जगदीश पाटील यांचा सहभाग होता. विद्यार्थ्यांनी महात्मा फुले यांच्या कार्यावर आधारित छोट्या इंग्रजी परिच्छेदांचे प्रवाही वाचन करून आपली भाषिक कौशल्ये प्रदर्शित केली.
“Education for All”, “Respect Everyone” अशा संदेशपर छोट्या इंग्रजी घोषवाक्यांचे वाचन करून विद्यार्थ्यांनी महात्मा फुले यांच्या विचारांचा सन्मान केला. उपशिक्षिका रूपाली आव्हाड यांनी विद्यार्थ्यांना मार्गदर्शन करताना सांगितले की, “महात्मा फुले यांनी समाजातील वंचित घटकांना शिक्षणाची दारे उघडली. त्यांचे विचार आजही तितकेच प्रेरणादायी आहेत. वाचनासारख्या उपक्रमांमुळे विद्यार्थ्यांमध्ये जागरूकता आणि भाषिक कौशल्ये दोन्ही वाढतात.”
या उपक्रमात सर्व शिक्षकांनी सहकार्य केले. विद्यार्थ्यांनी उत्स्फूर्तपणे सहभाग नोंदवत वाचनाच्या माध्यमातून महात्मा फुले यांच्या समाजसुधारणेच्या आणि शिक्षणविषयक कार्याला उजाळा दिला
