जळगाव, दि. १२ – सार्वजनिक शिवजयंती महोत्सव समितीच्यावतीने १९ फेब्रुवारी रोजी शिवजयंती साजरी करण्यासंदर्भात शहरातील मायादेवीनगर येथे रोटरी भवनात शनिवारी बैठक घेण्यात आली. गेल्या २० वर्षांपासून जळगाव शहरात शिवजयंतीचे आयोजन करण्यात येत असते. सर्व धर्म, जाती, पंथ यांना सोबत घेत दरवर्षी ७ दिवसाचा शिवमहोत्सव साजरा करण्यात येतो.
दरवर्षी महोत्सव समितीतर्फे व्याख्यान, पोवाडे, कीर्तन, नाटक अशा विविध माध्यमातून शिव विचार जन-सामान्यांपर्यंत पोहचविले जातात. या वर्षी करोनाचा प्रसार कमी झाल्याने हळूहळू जनजीवन पूर्वपदावर येत आहे. सरकार निर्बंध कमी करत असून यावर्षी शिवजयंती साजरी करण्यासंदर्भात सरकार आदेश देईल, त्या प्रमाणे शिवजयंती साजरी करण्याचा निर्णय बैठकीत झाला.
यावेळी महापौर जयश्री महाजन, उपमहापौर कुलभूषण पाटील, शिवसेनेचे जिल्हाप्रमुख विष्णू भंगाळे, माजी आमदार चंद्रकांत सोनवणे, राष्ट्रवादीचे एजाज मलिक, पुरुषोत्तम चौधरी, नगरसेवक अनंत जोशी, मुकुंद सपकाळे, उद्योजक किरण बच्छाव, करीम सालार, सुरेंद्र पाटील, विनोद देशमुख, फहीम पटेल, हिरालाल चव्हाण, समीर जाधव, विकास मराठे, अविनाश पाटील आदींसह पदाधिकारी समिती सदस्य उपस्थित होते. सार्वजनिक शिवजयंती ही सगळ्यांची आहे, यात सगळ्यांनी सामील व्हावे असे आवाहन शिवजयंती समितीचे निमंत्रक शंभु पाटील यांनी केले आहे.
