जळगाव, प्रतिनिधी : जळगाव जिल्हा मध्यवर्ती सहकारी बँकेच्या पंचवार्षिक निवडणुकीत महायुतीविरोधात काँग्रेस, शेतकरी संघटना आणि समविचारी पक्षांनी एकत्र येत ‘शेतकरी एकता पॅनेल’ मैदानात उतरविले आहे. या पॅनेलतर्फे सात जागा लढविण्यात येणार असल्याची माहिती काँग्रेसचे जिल्हाध्यक्ष अविनाश भालेराव, धनंजय चौधरी, शेतकरी संघटनेचे जिल्हाध्यक्ष सुनील देवरे आणि प्रशांत चौधरी यांनी पत्रकार परिषदेत दिली. यावेळी काँग्रेसचे शहर जिल्हाध्यक्ष जमील शेख आणि बाबा देशमुख उपस्थित होते.

जिल्हा बँकेच्या निवडणुकीत महायुतीने आमदार, मंत्री आणि त्यांच्या कुटुंबीयांनाच उमेदवारी दिल्याचा आरोप पॅनेलच्या नेत्यांनी केला. शेतकऱ्यांची बँक असलेल्या या संस्थेत शेतकरीपुत्रांना संधी मिळावी, तसेच निवडणूक बिनविरोध न होता लोकशाही पद्धतीने व्हावी, या उद्देशाने काँग्रेस व शेतकरी संघटनेने निवडणूक लढविण्याचा निर्णय घेतल्याचे त्यांनी सांगितले.

शेतकरी एकता पॅनेलतर्फे महिला राखीव मतदारसंघातून ज्योती नाना पाटील आणि सुलोचना भगवान पाटील, इतर संस्था मतदारसंघातून प्रशांत लिलाधर चौधरी, ओबीसी गटातून सुनील देवरे, भटक्या-विमुक्त जाती-जमाती मतदारसंघातून विकास ज्ञानेश्वर वाघ, रावेर तालुक्यातील प्राथमिक कृषी पतपुरवठा सोसायटी मतदारसंघातून योगीराज पाटील, तर यावल तालुक्यातून प्रशांत लिलाधर चौधरी हे उमेदवार आहेत.
दरम्यान, पुढील रणनीती ठरविण्यासाठी काँग्रेस व शेतकरी संघटनेची बैठक होत आहे.








