जळगाव (प्रतिनिधी) : लोकमान्य श्रमिक कामगार संघटनेच्या जळगाव जिल्हाध्यक्षपदी अर्जुन काशिनाथ पवार यांची नियुक्ती करण्यात आली आहे. संघटनेच्या ध्येय-धोरणांना बांधील राहून जिल्ह्यातील कामगारांच्या विविध समस्या व प्रश्न सोडविण्यासाठी तसेच वंचित कामगारांना न्याय मिळवून देण्यासाठी संघटनेच्या माध्यमातून प्रभावीपणे काम करण्याची जबाबदारी त्यांच्यावर सोपविण्यात आली आहे.
जळगाव येथे आयोजित कार्यक्रमात लोकमान्य श्रमिक कामगार संघटनेचे संस्थापक अध्यक्ष रविंद्र महाजन यांच्या हस्ते अर्जुन पवार यांची जिल्हाध्यक्षपदी नियुक्ती करण्यात आली. यावेळी संघटनेचे खजिनदार प्रविण महाजन उपस्थित होते. अर्जुन पवार हे माजी मंत्री गुलाबराव देवकर यांचे खंदे समर्थक आहेत.
जळगाव जिल्ह्यातील कामगारांच्या हक्कांसाठी तसेच त्यांच्या विविध समस्या शासन व प्रशासनापर्यंत पोहोचवून त्या सोडविण्यासाठी संघटनेच्या माध्यमातून प्रयत्न करण्यात येणार असल्याचे यावेळी सांगण्यात आले. अर्जुन पवार यांच्या नियुक्तीमुळे जिल्ह्यात लोकमान्य श्रमिक कामगार संघटनेचे संघटनात्मक कार्य अधिक मजबूत होण्यास मदत होईल, असा विश्वास संघटनेच्या पदाधिकाऱ्यांनी व्यक्त केला.
