रावेर, प्रतिनिधी : दारूच्या नशेत झालेल्या किरकोळ वादाचे पर्यवसान थेट खुनात झाल्याची धक्कादायक घटना रावेर तालुक्यातील केऱ्हाळे गावातील इंदिरानगर परिसरात मंगळवारी (६ ऑक्टोबर) दुपारी घडली. मिस्तरी कामासाठी वापरण्यात येणाऱ्या ग्राइंडर मशीनच्या कटरने गळ्यावर वार केल्याने २३ वर्षीय तरुणाचा जागीच मृत्यू झाल्याची प्राथमिक माहिती आहे. या प्रकरणी ६२ वर्षीय इसमाला रावेर पोलिसांनी ताब्यात घेतले आहे.
राजू रवींद्र कापडे (वय २३, रा. इंदिरानगर, केऱ्हाळे) असे मृत तरुणाचे नाव आहे. तर रामसिंग चिंधू भिल (वय ६२, रा. इंदिरानगर, केऱ्हाळे) असे पोलिसांच्या ताब्यात असलेल्या संशयिताचे नाव आहे.
मिळालेल्या माहितीनुसार, रामसिंग भिल हा मिस्तरी काम करतो आणि इंदिरानगर परिसरात एकटाच राहत असल्याचे सांगण्यात येते. मृत राजू कापडे हा त्याला जेवणाचा डबाही आणून देत असल्याची माहिती आहे. मंगळवारी दुपारी सुमारे दोन वाजेच्या सुमारास राजू हा रामसिंगच्या घरी गेला होता. त्यावेळी दोघेही दारूच्या नशेत असल्याचे सांगण्यात येते.
यावेळी किरकोळ कारणावरून दोघांमध्ये शाब्दिक वाद सुरू झाला. शिवीगाळीनंतर वादाचे रूपांतर हाणामारीत झाले. त्यानंतर रामसिंग याने मिस्तरी कामासाठी वापरण्यात येणाऱ्या ग्राइंडर मशीनच्या कटरने राजूच्या गळ्यावर वार केल्याचा आरोप आहे. या हल्ल्यात राजू गंभीर जखमी झाला आणि त्याचा मृत्यू झाला.
घटनेची माहिती मिळताच रावेर पोलिसांनी घटनास्थळी धाव घेतली. पोलिसांनी संशयित रामसिंग भिल याला ताब्यात घेतले. दरम्यान, झालेल्या मारहाणीत रामसिंग यालाही दुखापत झाल्याने त्याला उपचारासाठी रुग्णालयात दाखल करण्यात आले आहे.
या घटनेमागील नेमके कारण, वादाची सुरुवात कशावरून झाली आणि हल्ल्याचा संपूर्ण घटनाक्रम याबाबत रावेर पोलिसांकडून तपास सुरू आहे. या घटनेने केऱ्हाळे गावातील इंदिरानगर परिसरात खळबळ उडाली आहे.
