प्रेमसंबंधाला विरोध केल्याने धमक्या; तरुणाने उचलले टोकाचे पाऊल
आसोदा उड्डाणपुलाजवळ गळफास घेत आत्महत्या; तिघांविरुद्ध गुन्हा
जळगाव, प्रतिनिधी : मावस बहिणीच्या प्रेमसंबंधाला विरोध केल्याच्या कारणातून धमक्या व मानसिक त्रास दिल्याने तरुणाने गळफास घेऊन आत्महत्या केल्याची घटना देऊळवाडा (ता. जळगाव) येथील प्रशांत संजय सोनवणे (वय २८) याच्याबाबत घडली. आसोदा उड्डाणपुलाजवळ मंगळवारी (६ ऑक्टोबर) सकाळी साडेसहा वाजेच्या सुमारास ही घटना उघडकीस आली. याप्रकरणी संदीप महाजन, त्याचा भाऊ विशाल महाजन आणि आई अशा तिघांविरुद्ध जळगाव तालुका पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, प्रशांत सोनवणे याच्या मावस बहिणीचे संदीप महाजन याच्यासोबत प्रेमसंबंध होते. मात्र, या संबंधाला प्रशांतचा विरोध होता. याच कारणातून संशयितांकडून प्रशांतला वाटेत अडवून धमकावणे, अपमानित करणे आणि मानसिक त्रास देणे सुरू असल्याचा आरोप फिर्यादीत करण्यात आला आहे.
या प्रकारामुळे प्रशांत मानसिक विवंचनेत असल्याचे कुटुंबीयांचे म्हणणे आहे. मंगळवारी सकाळी आसोदा उड्डाणपुलाजवळील गवळी मुंजोबा मंदिरामागे शेताच्या बांधावर त्याने गळफास घेतल्याचे आढळून आले.
घटनेची माहिती मिळताच जळगाव तालुका पोलिसांनी घटनास्थळी धाव घेत पंचनामा केला. कुटुंबीयांच्या फिर्यादीवरून संशयित तिघांविरुद्ध गुन्हा दाखल करण्यात आला असून, या प्रकरणाचा पुढील तपास तालुका पोलीस करीत आहेत.
