जळगाव, (प्रतिनिधी) : भरधाव अज्ञात वाहनाने दुचाकीला जोरदार धडक दिल्याने मध्य प्रदेशातील दोन दुचाकीस्वारांचा मृत्यू झाला. हा अपघात मंगळवारी (दि. २२) रात्री सुमारे एकच्या सुमारास पाळधी ते तरसोद वळण मार्गावर, असोदा उड्डाणपुलाजवळ घडला. या घटनेप्रकरणी तालुका पोलिस ठाण्यात अज्ञात वाहनचालकाविरुद्ध गुन्हा दाखल करण्यात आला आहे.
मध्य प्रदेशातील बिरोदा येथील युवराज भिका सोनवणे (वय ३४) आणि पवन अनिल चौधरी (वय २९) हे दोघे मित्र दुचाकीने (एमपी ६८ झेडडी ९२३२) सुरत येथे जात होते. जळगाव शहरात आल्यानंतर ते तरसोद-पाळधी बाह्यवळण मार्गाने पुढे जात असताना असोदा उड्डाणपुलाजवळ त्यांच्या दुचाकीला अज्ञात वाहनाने धडक दिली.
धडक एवढी जोरदार होती की दुचाकीच्या समोरील भागाचा चुराडा झाला. अपघातात दोन्ही दुचाकीस्वार गंभीर जखमी झाले. त्यांना उपचारासाठी शासकीय वैद्यकीय महाविद्यालय व रुग्णालयात दाखल करण्यात आले. मात्र, उपचारादरम्यान दोघांचा मृत्यू झाला.
या प्रकरणी कुमुद अनिल चौधरी यांनी दिलेल्या फिर्यादीवरून तालुका पोलिस ठाण्यात अज्ञात वाहनचालकाविरुद्ध गुन्हा दाखल करण्यात आला आहे. अपघातानंतर घटनास्थळावरून निघून गेलेल्या अज्ञात वाहनाचा तसेच चालकाचा शोध पोलिसांकडून सुरू आहे.
