जळगाव, प्रतिनिधी : तामिळनाडूचे मुख्यमंत्री सी. जोसेफ विजय (थलपथी) यांच्या नावाने बनावट सोशल मीडिया खाते तयार करून त्यावर आक्षेपार्ह मजकूर आणि एआय तंत्रज्ञानाद्वारे तयार केलेले व्हिडिओ प्रसारित केल्याप्रकरणी एका होमगार्डला चेन्नई पोलिसांनी नशिराबाद येथून ताब्यात घेतले.
मोहम्मद जुनेद शेख कुतुबुद्दीन (३८, रा. ताजनगर, नशिराबाद) असे या होमगार्डचे नाव आहे. मुख्यमंत्री विजय यांच्या बनावट अकाऊंटवरून वादग्रस्त आणि आक्षेपार्ह मजकूर पोस्ट केला जात असल्याबाबत चेन्नई येथील आनंदनगर पोलिस ठाण्यात गुन्हा नोंदवण्यात आला होता.
सायबर तपासादरम्यान संबंधित आयपी ॲड्रेस आणि इंटरनेट वापराचे लोकेशन नशिराबाद असल्याचे स्पष्ट झाले. त्यानुसार चेन्नई वेस्ट झोन सायबर पोलिस ठाण्याचे पोलिस निरीक्षक के. पालवेशम व त्यांच्या पथकाने नशिराबाद पोलिस ठाण्यात संपर्क साधून मंगळवारी ही कारवाई केली.
संशयिताची सखोल चौकशी केल्यानंतर जळगाव न्यायालयातून कायदेशीर परवानगी मिळवून चेन्नई पोलिस त्याला पुढील तपासासाठी सोबत घेऊन गेले आहेत.
