पारोळा : दुचाकीवरून पडून गंभीर जखमी झालेल्या नववीतील विद्यार्थ्याचा उपचारापूर्वीच मृत्यू झाल्याची दुर्दैवी घटना २६ ऑगस्ट रोजी रात्री आठ वाजेच्या सुमारास पारोळा तालुक्यात घडली. राजेश नीलेश पावरा (वय १५, रा. मूळ चिलारे, ता. शिरपूर; हल्ली आंबापिंप्री, ता. पारोळा) असे मयत विद्यार्थ्याचे नाव आहे.
पारोळा तालुक्यातील बहादरपूर ते जिराळी रस्त्यावर राजेश पावरा आणि किसन भील हे हिरो कंपनीच्या दुचाकीवरून जात असताना दुचाकीवरून खाली पडले. या अपघातात दोघेही गंभीर जखमी झाले.
घटनेनंतर दोघांना रुग्णवाहिकेने पारोळा येथील कुटीर रुग्णालयात दाखल करण्यात आले. तेथे वैद्यकीय अधिकाऱ्यांनी तपासणी केल्यानंतर राजेश पावरा याला मयत घोषित केले. तर किसन भील याला पुढील उपचारासाठी धुळे जिल्हा रुग्णालयात दाखल करण्यात आले.
याबाबत अमरसिंग पाडवी यांनी दिलेल्या माहितीनुसार पारोळा पोलीस ठाण्यात घटनेची नोंद करण्यात आली आहे. हवालदार प्रवीण पाटील तपास करीत आहेत.
