यावल तालुक्यातील डांभुर्णीत हवेत गोळीबार; कोळन्हावी ग्रामपंचायतीच्या सरपंचाला अटक
हॉटेलमधील वादातून दहशत निर्माण करण्याचा प्रयत्न; पिस्तूल जप्त
यावल प्रतिनिधी
यावल तालुक्यातील डांभुर्णी येथे भरचौकात पिस्तुलातून हवेत गोळीबार करून दहशत पसरवणाऱ्या कोळन्हावी ग्रामपंचायतीचा सरपंच विकास उर्फ गोटू जगन्नाथ सोळंके (वय ३७) याला यावल पोलिसांनी अटकाव केला आहे. संशयिताच्या ताब्यातून गावठी बनावटीचे पिस्तूल, मॅगझीन आणि एक जिवंत काडतूस हस्तगत करण्यात आले आहे.
२७ ऑगस्ट रोजी रात्री आठ वाजेच्या सुमारास डांभुर्णीतील किनगाव रोडलगत शिवसम्राट बिर्याणी दुकानाजवळ गोळीबार झाल्याची माहिती मिळताच पोलिसांनी घटनास्थळी पोहोचून फॉरेन्सिक टीमच्या मदतीने रिकामी पुंगळी जप्त केली. प्रत्यक्षदर्शींच्या माहितीनुसार, आरोपी गोटू सोळंके यानेच हे कृत्य केल्याचे स्पष्ट झाले. घटनेनंतर संशयित जळगावकडे पसार झाल्याची माहिती मिळताच यावल पोलीस आणि स्थानिक गुन्हे शाखेच्या पथकाने संयुक्त कारवाई करत मध्यरात्री एक वाजेच्या सुमारास कालंका माता मंदिर परिसरातून त्याला ताब्यात घेतले. चौकशीदरम्यान, डांभुर्णीतील काही तरुण आपल्या हॉटेलमध्ये येऊन व्हिडिओ काढून त्रास देत असल्याने, त्यांच्यात दहशत बसवण्यासाठी गोळीबार केल्याची कबुली आरोपीने दिली. आरोपीच्या माहितीवरून कोळन्हावी शिवारातील त्याच्या शेतातून लपवून ठेवलेले पिस्तूल जप्त करण्यात आले. या प्रकरणी भारतीय न्याय संहिता कलम १२५ व आर्म्स ॲक्टनुसार गुन्हा दाखल करण्यात आला असून उपनिरीक्षक मैनुद्दीन सय्यद पुढील तपास करत आहेत.
