जळगाव, प्रतिनिधी : महाराष्ट्राच्या समृद्ध कला, लोकपरंपरा आणि सांस्कृतिक वारशाला आधुनिक सादरीकरणाची जोड देत ‘फोकलोक’ या कार्यक्रमाची निर्मिती करण्यात आली आहे. या निर्मितीमागील संकल्पना, प्रवास आणि अनुभव जाणून घेण्यासाठी ‘फोकलोक’च्या कलावंतांच्या टीमने जळगाव येथे ‘परिवर्तन’च्या सदस्यांशी महावीर क्लासेसच्या सभागृहात संवाद साधला. यावेळी मुकुल शिंगाडे (लेखक, दिग्दर्शक व संगीतकार), सई जोशी (संगीतकार), प्रसाद नाकील, कौस्तुभ सोनवणे, धनंजय दिघे, सिद्धांत उमव्रीकर (अभिनेता) आणि सिद्धार्थ आदी कलावंत उपस्थित होते.
या संवादादरम्यान ‘फोकलोक’च्या निर्मितीमागील भूमिका, महाराष्ट्रातील विविध लोककला व लोकपरंपरांचा शोध, त्या परंपरांना समकालीन रंगभूमीच्या माध्यमातून प्रेक्षकांपर्यंत पोहोचविण्याचा प्रयत्न याबाबत कलावंतांनी सविस्तर माहिती दिली. प्रयोगशीलते मधून फोक लोक कार्यक्रमाचा जन्म, शिकत असताना आपल्याला लोकसंगीत आवडत, ते सादर करायला जमत हे कळल होत. हेच आपलं वैभव घेऊन आपण रसिकांपुढे जाऊ अस वाटल आणि आम्ही गेलो.
नाट्य व्यवसाय, त्याची गणित हे काहीही माहिती नव्हत, पण लोकांचा असा प्रतिसाद मिळाला ज्या मुळे आम्हाला मागे वळून बघावं लागलं नाही. लोककला, लोकसंगीत, लोकजीवन आणि परंपरांचे जतन करताना त्यांना आजच्या पिढीशी जोडण्याचे आव्हानही त्यांनी अधोरेखित केले. ‘फोकलोक’ची निर्मिती करताना आलेल्या विविध अडचणी, प्रयोगशीलतेचा प्रवास, कलाकारांचे अनुभव तसेच संकल्पनेपासून प्रत्यक्ष कार्यक्रमाच्या निर्मितीपर्यंतच्या प्रक्रियेविषयी उपस्थितांनी विचारलेल्या विविध प्रश्नांना कलावंतांनी मनमोकळेपणाने उत्तरे दिली.
“आपल्या मातीतल्या कला आणि लोकपरंपरा यांना सोबत घेऊन महाराष्ट्राच्या सांस्कृतिक वैभवाचे प्रभावी दर्शन घडविणारा एक दर्जेदार कार्यक्रम निर्माण करण्याचा प्रयत्न ‘फोकलोक’च्या माध्यमातून झाला आहे,” अशी भावना या संवादातून व्यक्त झाली.
याप्रसंगी ‘परिवर्तन’चे अध्यक्ष शंभू पाटील यांच्यासह अनिल कांकरिया, शिवाजी पवार, नंदलाल गादिया, विनोद पाटील, सुनीता सरकार, मंजुषा भिडे, विनोद अजनाडकर, सुरेंद्र पाटील, सुरेश पाटील, राहुल निंबाळकर, भगवान भोई, अक्षय नेहे, समृद्धी पाटील, हर्षल पाटील, निलेश पाटील, वरुण नेवे, जय सोनार, गणेश सोनार, समीक्षा पाटील आदी ‘परिवर्तन’चे सदस्य उपस्थित होते.
