जळगाव, (प्रतिनिधी) : पोलीस अधीक्षक बंगल्यावरील सुरक्षा कर्तव्यात गंभीर निष्काळजीपणा आणि शस्त्रास्त्रांच्या सुरक्षेकडे दुर्लक्ष केल्याप्रकरणी जळगाव पोलीस दलातील दोन अंमलदारांना तातडीने निलंबित करण्यात आले आहे. पोलीस अधीक्षक श्रीकांत धिवरे यांनी ही धडक कारवाई केली असून, यामुळे पोलीस विभागात मोठी खळबळ उडाली आहे.
शुक्रवारी रात्री ९:२० वाजेच्या सुमारास राखीव पोलीस निरीक्षकांनी अधीक्षक बंगल्यावरील गार्ड ड्युटीची अचानक तपासणी केली. यावेळी कर्तव्यावर असलेले सहाय्यक फौजदार संभाजी निबाजी पाटील आणि पोलीस नाईक प्रदीप भगतसिंग राजपूत हे दोघेही विनापरवानगी आपल्या कर्तव्यस्थळावरून गैरहजर असल्याचे आढळले.
तपासणीदरम्यान केवळ गैरहजेरीच नाही, तर सुरक्षेच्या दृष्टीने अत्यंत गंभीर बाब समोर आली. गार्ड रूममध्ये असलेली एस.एल.आर. रायफल कोणतीही सुरक्षा खबरदारी न घेता बेवारस अवस्थेत ठेवलेली आढळली. अतिसंवेदनशील परिसरात शस्त्रास्त्रांबाबतचा असा हलगर्जीपणा सुरक्षेसाठी घातक मानला जात आहे.
शासकीय शस्त्रांची निगा न राखणे आणि कर्तव्यात कसूर करणे हा महाराष्ट्र नागरी सेवा (वर्तणूक) नियमांचे उल्लंघन असल्याचे स्पष्ट झाले आहे. या घटनेचे गांभीर्य लक्षात घेऊन अधीक्षक धिवरे यांनी दोघांनाही तत्काळ निलंबित केले असून, त्यांची विभागीय चौकशीही सुरू करण्यात येणार आहे. निलंबन काळात त्यांना मुख्यालय न सोडण्याचे आदेश देण्यात आले असून, शिस्तीबाबत कोणतीही तडजोड केली जाणार नसल्याचा कडक इशारा या कारवाईतून देण्यात आला आहे.
