जळगाव, (प्रतिनिधी) : सार्वजनिक बांधकाम विभागातील (PWD) शाखा अभियंता योगेश अभिमन्यू अहिरे (वय ४४) यांना ५ लाख रुपयांची लाच स्वीकारताना लाचलुचपत प्रतिबंधक विभागाने आज रंगेहात पकडले. प्रलंबित देयके मंजूर करण्यासाठी त्यांनी एकूण १५ लाख रुपयांच्या लाचेची मागणी केली होती.
तक्रारदार हे सब-कॉन्ट्रॅक्टर असून त्यांनी जळगाव शहरातील वॉर्ड क्र. १४ विनोबा नगर येथील सिमेंट काँक्रीट रस्त्याचे काम पूर्ण केले होते. या कामाचे सुमारे ३८ लाख ४९ हजार रुपयांचे बिल अद्याप प्रलंबित होते. हे थकीत बिल मंजूर करण्याच्या बदल्यात शाखा अभियंता योगेश अहिरे यांनी सुरुवातीला १८ लाख रुपयांची मागणी केली होती. तडजोडीअंती ही रक्कम १५ लाख रुपये ठरवण्यात आली. यामध्ये स्वतःसाठी ७ लाख ५० हजार आणि वरिष्ठ अधिकाऱ्यांसाठी ७ लाख ५० हजार रुपये देण्याचे अहिरे यांनी मान्य केले होते.
लाचेच्या रकमेपैकी पहिला हप्ता म्हणून ५ लाख रुपये आज (९ मे २०२६) देण्याचे ठरले होते. लाचलुचपत प्रतिबंधक विभागाने या तक्रारीची पडताळणी करून जळगाव सार्वजनिक बांधकाम विभाग परिसरात सापळा रचला. योगेश अहिरे यांनी आपल्या निळ्या रंगाच्या बलेनो कारमध्ये (एम.एच.१९ सी.व्ही.२६१९) बसून ५ लाख रुपयांची लाच स्वीकारली. पैसे स्वीकारताच दबा धरून बसलेल्या एसीबीच्या पथकाने त्यांना ताब्यात घेतले.
ही कारवाई लाचलुचपत प्रतिबंधक विभाग, नाशिक परिक्षेत्राचे पोलीस अधीक्षक शर्मिष्ठा वालावलकर, अपर पोलीस अधीक्षक माधव रेड्डी, जळगाव एसीबीचे पोलीस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक रेश्मा आवतारे आणि त्यांच्या पथकाने यशस्वी केली. याप्रकरणी जिल्हापेठ पोलीस ठाण्यात गुन्हा दाखल करण्याची प्रक्रिया सुरू आहे.
