पाचोरा, (प्रतिनिधी) : शहरातील चोरीच्या घटनांचा छडा लावण्यात पाचोरा पोलिसांना मोठे यश आले आहे. अत्यंत कौशल्याने तपास चक्रे फिरवत पोलिसांनी केवळ तीन तासांच्या आत चोरीचे दोन गुन्हे उघडकीस आणले असून, ९४ हजार ५०० रुपये किमतीचे तीन ए.सी. आणि ३० हजार रुपयांची सोन्याची पोत असा एकूण सव्वा लाखांचा मुद्देमाल हस्तगत केला आहे. या कारवाईमुळे परिसरात पोलिसांचे कौतुक होत आहे.
मिळालेल्या माहितीनुसार, जारगाव (ता. पाचोरा) येथील रहिवासी आणि इलेक्ट्रिकल व्यावसायिक नय्युम जहांगीर देशमुख यांच्या अक्सानगर येथील गोदामातून अज्ञात चोरट्यांनी १ एप्रिल ते १४ एप्रिल दरम्यान तीन गोदरेज कंपनीचे ए.सी. लंपास केले होते. याप्रकरणी १६ एप्रिल रोजी पाचोरा पोलीस ठाण्यात गुन्हा दाखल करण्यात आला होता.
गुन्ह्याचे गांभीर्य ओळखून जिल्हा पोलीस अधीक्षक महेश्वर रेड्डी, अपर पोलीस अधीक्षक श्रीमती कविता नेरकर आणि उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार यांनी तपासासाठी विशेष पथक नियुक्त केले. गोपनीय माहिती आणि तांत्रिक तपासाच्या आधारे पोलिसांनी रिहान हमीश शहा (वय २२, रा. हनुमान नगर, पाचोरा) या संशयिताला ताब्यात घेतले. पोलिसी खाक्या दाखवताच त्याने गोदामातून ए.सी. चोरी केल्याची कबुली दिली. पोलिसांनी त्याच्याकडून ९४,५०० रुपये किमतीचे तिन्ही ए.सी. जप्त केले आहेत.
याच तपासादरम्यान, १५ एप्रिल २०२६ रोजी दाखल झालेला सोन्याची पोत चोरीचा आणखी एक गुन्हा पोलिसांनी उघडकीस आणला. ३० हजार रुपये किमतीची ही सोन्याची पोतदेखील पोलिसांनी हस्तगत केली आहे. अवघ्या तीन तासांत दोन मोठे गुन्हे उघड करून पूर्ण मुद्देमाल हस्तगत केल्याने फिर्यादी व नागरिकांनी पोलिसांचे आभार मानले आहेत.
ही यशस्वी कारवाई पोलीस निरीक्षक राहुलकुमार पवार यांच्या नेतृत्वाखाली स.फौ. विलास पाटील, पोहेकाँ वसीम शेख, श्रीकांत गायकवाड, पोकाँ योगेश पाटील, संदीप राजपूत आणि गणेश कुंवर यांच्या पथकाने केली आहे. गुन्हेगारांवर वचक बसवण्यासाठी पाचोरा पोलिसांनी राबवलेल्या या मोहिमेचे सर्वत्र स्वागत होत आहे.
