जळगाव, (प्रतिनिधी) : शहरात रिक्षा चोरीच्या घटनांना आळा घालण्यासाठी जिल्हापेठ पोलिसांनी मोठी कारवाई केली असून, सिव्हिल हॉस्पिटलमधून रिक्षा चोरणाऱ्या एका संशयिताला ताब्यात घेतले आहे. पोलिसांनी त्याच्याकडून ७५ हजार रुपये किमतीची रिक्षा जप्त केली आहे.
दिनांक १२ एप्रिल २०२६ रोजी जळगाव शहरातील सिव्हिल हॉस्पिटलच्या गेट क्रमांक ३ मधील पार्किंगमधून MH१९ BJ ४०२५ क्रमांकाची ॲपे रिक्षा चोरीला गेली होती. याप्रकरणी जिल्हापेठ पोलीस ठाण्यात गुन्हा दाखल करण्यात आला होता.
गुन्ह्याचे गांभीर्य लक्षात घेऊन प्रभारी अधिकारी यांच्या मार्गदर्शनाखाली जिल्हापेठ पोलिसांनी तपासासाठी विशेष पथक तयार केले. तांत्रिक विश्लेषण आणि गुप्त बातमीदाराकडून मिळालेल्या माहितीनुसार, कल्पेश ज्ञानेश्वर इंगळे (वय ३२, रा. रामेश्वर कॉलनी, मेहरूण, मूळ रा. शिरपूर, जि. धुळे) याच्याकडे संशयित रिक्षा असल्याची माहिती मिळाली.
पोलीस पथक त्याच्या शोधात असताना, संशयित कल्पेश हा एम.एस.ई.बी. ऑफिस (पांडे डेअरी चौक) जवळ रिक्षासह पोलिसांच्या जाळ्यात सापडला. पोलिसांनी त्याला थांबवून विचारपूस केली असता, त्याने सिव्हिल हॉस्पिटलमधून ही रिक्षा चोरल्याची कबुली दिली. पोलिसांनी ७५ हजार रुपये किमतीची रिक्षा जप्त करून त्याला ताब्यात घेतले आहे.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे यांच्या मार्गदर्शनाखाली सहाय्यक पोलीस निरीक्षक अनिल वाघ आणि त्यांच्या पथकातील मिलिंद सोनवणे, कमलेश पवार, तुषार पाटील, गोविंद साबळे, नरेंद्र दिवेकर आणि प्रवीण जाधव यांनी यशस्वीरित्या पार पाडली. या प्रकरणाचा पुढील तपास पोना कमलेश पवार करत आहेत.
