जळगाव, (प्रतिनिधी) : समाजाच्या प्रश्नांसाठी अहोरात्र धावणाऱ्या पत्रकारांच्या मनगटातील जोर आणि खेळाडूवृत्तीचा प्रत्यय जळगावकरांना नुकताच आला. अत्यंत चुरशीच्या ठरलेल्या ‘पत्रकार प्रीमियर लीग’ पर्व-२ च्या अंतिम सामन्यात प्रेस फोटोग्राफर संघाने बाजी मारत विजेतेपदावर आपले नाव कोरले. या स्पर्धेत जळगाव प्रिंट मीडिया संघाला उपविजेतेपदावर समाधान मानावे लागले, तर प्रेस एडिटर संघाने तृतीय क्रमांक पटकावला.
२४ संघांचा सहभाग आणि अटीतटीचे सामने..
जळगावच्या सागर पार्क मैदानावर २६ ते २९ मार्च दरम्यान पार पडलेल्या या स्पर्धेत संपूर्ण जिल्ह्यातील तालुकानिहाय १४ संघ आणि जळगाव शहरातून संपादक, लोकप्रतिनिधी, प्रशासन, डॉक्टर व पोलीस अशा एकूण २४ संघांनी सहभाग नोंदवला होता. या सामन्यांमध्ये फलंदाजी आणि गोलंदाजीचा उच्चांक पाहायला मिळाला. विशेष म्हणजे, एका सामन्यात ९९ धावांची सर्वोच्च धावसंख्या तर एका सामन्यात २० धावांची निचांकी धावसंख्या देखील नोंदवली गेली.
अधिकारी आणि पत्रकारांच्या मैत्रीपूर्ण लढती..
स्पर्धेच्या शेवटच्या दिवशी केवळ पत्रकारांमध्येच नाही, तर प्रशासकीय अधिकाऱ्यांमध्येही चुरस पाहायला मिळाली. प्रांताधिकारी विनय गोसावी यांच्या नेतृत्वाखालील जिल्हाधिकारी कार्यालय संघाने वैद्यकीय महाविद्यालय संघावर मात केली. तर, पोलीस अधीक्षक डॉ. महेश्वर रेड्डी यांच्या नेतृत्वाखालील पोलीस दलाच्या संघाने जिल्हाधिकारी कार्यालय आणि आयोजन समितीच्या संघांना पराभूत करत मैदान मारले.
दिमाखदार पारितोषिक वितरण..
स्पर्धेचे उद्घाटन पालकमंत्री गुलाबराव पाटील व मंत्री संजय सावकारे यांच्या हस्ते झाले होते. तर चार दिवसांच्या या प्रवासात केंद्रीय राज्यमंत्री रक्षा खडसे, मंत्री गिरीश महाजन, खासदार स्मिता वाघ, आ. राजुमामा भोळे, आ. किशोर पाटील यांच्यासह जिल्हाधिकारी डॉ. रोहन घुगे आणि पोलीस अधीक्षक डॉ. महेश्वर रेड्डी यांनी प्रत्यक्ष भेट देऊन खेळाडूंचा उत्साह वाढवला.
या यशस्वी आयोजनासाठी किशोर पाटील, वाल्मिक जोशी, प्रवीण सपकाळे, चेतन वाणी, जकी अहमद, भगवान सोनार, वसीम खान, सचिन गोसावी, राकेश वाणी, यामिनी कुलकर्णी यांनी परिश्रम घेतले.
