जळगाव, (प्रतिनिधी) : जिल्हा परिषद जळगावच्या दिव्यांग कल्याण विभागामार्फत ‘जि.प. सेस २०२५-२६’ अंतर्गत एक महत्त्वपूर्ण आणि कौतुकास्पद पाऊल उचलण्यात आले आहे. जिल्ह्यातील नोंदणीकृत व मान्यताप्राप्त कर्णबधीर विद्यालयांमध्ये शिक्षण घेणाऱ्या ३४६ विद्यार्थ्यांना एकूण ६९२ उच्च दर्जाच्या कर्णयंत्रांचे वितरण करण्यात आले असून, या योजनेसाठी ५३ लाख रुपयांचा निधी खर्च करण्यात आला आहे.
जिल्हाधिकारी कार्यालयात आज जिल्हा दिव्यांग समितीची आढावा बैठक पार पडली. जिल्हाधिकारी तथा समितीचे अध्यक्ष रोहन घुगे यांच्या अध्यक्षतेखाली झालेल्या या बैठकीत जिल्ह्यातील दिव्यांग कल्याणाशी संबंधित विविध योजनांचा सविस्तर आढावा घेण्यात आला. यावेळी जिल्हा परिषदेच्या मुख्य कार्यकारी अधिकारी मीनल करनवाल, जिल्हा शल्यचिकित्सक डॉ. स्वप्निल सांगोळे, समाज कल्याण सहाय्यक आयुक्त योगेश पाटील, नगरपालिका सहआयुक्त जनार्दन पवार, दिव्यांग सक्षमीकरण अधिकारी पद्मनाभ म्हस्के यांच्यासह विविध दिव्यांग संघटनांचे प्रतिनिधी उपस्थित होते.
या उपक्रमाचे वैशिष्ट्य म्हणजे यासाठी लागणारा ५३ लक्ष इतका निधी जिल्हा परिषदेने आपल्या स्व-उत्पन्नातून उपलब्ध करून दिला आहे. बैठकीदरम्यान या योजनेचा प्रातिनिधिक वितरण सोहळा पार पडला. यावेळी जिल्हाधिकारी रोहन घुगे आणि मुख्य कार्यकारी अधिकारी मीनल करनवाल यांच्या हस्ते विद्यार्थ्यांना कर्णयंत्रांचे वाटप करण्यात आले.
या आधुनिक कर्णयंत्रांमुळे विद्यार्थ्यांच्या श्रवण क्षमतेत लक्षणीय वाढ होणार असून, त्यांच्या शालेय शिक्षणातील अडथळे दूर होण्यास मदत होईल. दैनंदिन जीवनातील संवाद सुधारल्यामुळे या विद्यार्थ्यांचा आत्मविश्वास वाढून त्यांना समाजाच्या मुख्य प्रवाहात येणे सुलभ होणार आहे. जिल्हा परिषदेच्या या स्तुत्य उपक्रमामुळे दिव्यांग विद्यार्थ्यांच्या सर्वांगीण विकासाला मोठी चालना मिळणार आहे. दिव्यांग बांधवांच्या जीवनमानात सकारात्मक बदल घडवून आणण्यासाठी प्रशासन कटिबद्ध असल्याचे यावेळी स्पष्ट करण्यात आले.
