जळगाव, (प्रतिनिधी) : बार कौन्सिल ऑफ महाराष्ट्र अँड गोवा २०२६ ची निवडणूक उद्या (दि.२४ मार्च) पार पडणार असून जळगाव शहरातून यंदा दोन उमेदवार मैदानात उतरले आहेत. ॲड. गुलाबसिंग मानसिंग पाटील आणि ॲड. रेखा घनश्याम कोचुरे हे उमेदवार निवडणूक लढवत आहेत.
यामध्ये विशेष बाब म्हणजे ॲड. रेखा घनश्याम कोचुरे या जळगाव शहरातून बार कौन्सिल ऑफ महाराष्ट्र अँड गोवाच्या निवडणुकीत उतरणाऱ्या पहिल्या महिला उमेदवार ठरल्या आहेत. यापूर्वी ॲड. एल. एल. बेंडाळे, ॲड. भरत देशमुख आदींनी प्रतिनिधित्व केले असले, तरी जळगाव न्यायालयातून महिला उमेदवार कधीच समोर आली नव्हती.
या निवडणुकीत एकूण २३ सदस्यांची निवड होणार असून त्यात ५ महिलांसाठी जागा राखीव आहेत. तसेच २ महिला को-ऑप्ट मेंबर्सची निवड नंतर केली जाणार असून एकूण सदस्यसंख्या २५ असेल.
जर ॲड. रेखा घनश्याम कोचुरे विजयी झाल्या, तर खानदेशातून बार कौन्सिल ऑफ महाराष्ट्र अँड गोवावर निवडून जाणाऱ्या त्या पहिल्या महिला सदस्य ठरून इतिहास रचतील. त्यामुळे संपूर्ण वकिल समुदायाचे लक्ष या निवडणुकीकडे लागले आहे.
