जळगाव, (प्रतिनिधी) : जिल्ह्याचे नवनियुक्त जिल्हाधिकारी रोहन घुगे (भाप्रसे) यांनी गुरुवार, दि.९ ऑक्टोबर रोजी जिल्हाधिकारी पदाचा पदभार स्वीकारला. त्यांच्या पूर्वीच्या कार्यकाळात ठाणे जिल्हा परिषदेने डिजिटल प्रशासन आणि ग्रामीण विकासाच्या क्षेत्रात नेत्रदीपक यश मिळवले असल्याने, जळगाव जिल्ह्याच्या प्रशासनाला आता नवी गती व ‘डिजिटल’ दिशा मिळण्याची अपेक्षा व्यक्त होत आहे. माजी जिल्हाधिकारी आयुष प्रसाद यांची बदली नाशिक येथे झाल्यानंतर, त्यांच्या रिक्त जागी शासन आदेशान्वये रोहन घुगे यांची नियुक्ती करण्यात आली आहे.
डिजिटल प्रशासन, शिक्षण आणि आरोग्य या क्षेत्रातील यशस्वी कारकीर्द..
जिल्हाधिकारी रोहन घुगे यापूर्वी जिल्हा परिषद, ठाणे येथे मुख्य कार्यकारी अधिकारी (CEO) म्हणून कार्यरत होते. त्यांच्या दूरदर्शी नेतृत्वाखाली ठाणे जिल्हा परिषदेने डिजिटल प्रशासन, शिक्षण, आरोग्य आणि ग्रामीण विकास या क्षेत्रांमध्ये भरीव आणि उल्लेखनीय काम केले आहे. विशेष म्हणजे, ‘कार्यालयीन मूल्यमापन – १०० दिवसांचा कृती कार्यक्रम’ अंतर्गत ठाणे जिल्हा परिषदेला संपूर्ण राज्यात प्रथम क्रमांक प्राप्त झाला होता. या अनुभवाचा लाभ आता जळगाव जिल्ह्याला मिळणार आहे.
पदभार स्वीकारताना अपर जिल्हाधिकारी श्रीमंत हारकर आणि निवासी उपजिल्हाधिकारी वैशाली चव्हाण यांच्यासह जिल्हा प्रशासनातील प्रमुख अधिकारी उपस्थित होते.
