जळगाव, (प्रतिनिधी) : शहरातील भोईवाडा येथे राहणाऱ्या एका तरुणाच्या घरातून २ लाख ३० हजार रुपये किमतीचे सोन्याचे दागिने चोरून नेल्याची घटना बुधवारी २ एप्रिल रोजी सकाळी ८ वाजता समोर आली आहे. याप्रकरणी शनिपेठ पोलीस ठाण्यात अज्ञात चोरट्यांवर गुन्हा दाखल करण्यात आला आहे.
भरत सुभाष पवार (वय-२८, रा.भोईवाडा जळगाव) हा तरुण खाजगी नोकरी करून तो आपला उदरनिर्वाह करतो. दि.२७ मार्च ते २ एप्रिल दरम्यान त्याचे घर बंद होते. घर बंद असल्याचा फायदा घेत अज्ञात चोरट्याने घरातून सोन्याचा चपलाहार, कानातले टोंगल तसेच सोन्याची मणी असा एकूण २ लाख ३० हजार रुपये किमतीचा ऐवज चोरून नेला. ही घटना बुधवारी समोर आली.
घटना घडल्यानंतर भरत पवार यांनी शनीपेठ पोलीस ठाण्यात या संदर्भात फिर्याद दिली. त्यानुसार अज्ञात चोरट्यांविरोधात शनिपेठ पोलीस ठाण्यात गुन्हा दाखल करण्यात आला आहे. या घटनेचा पुढील तपास पोलीस उपनिरीक्षक योगेश ढिकले करीत आहे.
