जळगाव, (प्रतिनिधी) : शहरातील गुजराल पेट्रोल पंप परिसरातील वाईन शॉप मालकाला खंडणीसाठी धमकी दिल्याचा प्रकार समोर आला आहे. या प्रकरणी वाईन शॉप चालकाच्या फिर्यादीवरुन जिल्हा पेठ पोलिस ठाण्यात तिघांविरुद्ध गुन्हा दाखल करण्यात आला आहे.
गुजराल पेट्रोल पंप परिसरात अमोल संतोष कोळी हे वाईन शॉप चालवतात. दि.१ एप्रिल रोजी रात्री ९.४५ वाजता तीन जण वाईन शॉपवर आले. त्यांनी काही वस्तू घेतल्यानंतर अमोल कोळी याने संबधितांकडून वस्तुचे पैसे मागितले. त्यावर आकाश पाटील, गंप्या उर्फ अक्षय राठोड (रा.पिंप्राळा), दीपेश उर्फ फॉक्सन पाटील (रा.मानराज पार्क) या तीघांनी पैसे द्यायला नकार दिला. तसेच आमच्याकडून पैसे घ्यायचे नाहीत, आमचा रेकॉर्ड तुम्हाला माहिती नाही का…? असे सांगत, अमोल कोळी यांना शिवीगाळ करत जर धंदा करायचा असेल तर दररोज बियर व महिन्याला १० हजार रुपये द्यावे लागतील अशी धमकी दिली.
दुकान मालक अमोल कोळीला चॉपरने मारण्याची धमकी दिली. तसेच शिवीगाळ देखील केली. या प्रकरणी बुधवारी अमोल कोळी याच्या फिर्यादीवरुन आकाश पाटील, दीपेश पाटील व अक्षय कोळी या तीघांविरुद्ध जिल्हापेठ पोलिस ठाण्यात गुन्हा दाखल करण्यात आला आहे. पुढील तपास शांताराम देशमुख हे करत आहेत.
