मुंबई, (वृत्तसेवा) : बॉलिवूड अभिनेता सैफ अली खान याच्यावर चाकू हल्ला झाल्याची घटना समोर आली आहे. सैफ याच्या घरात चोर शिरला होता, दरम्यान चोराशी झटापट झाल्याने त्याच्यावर चाकू हल्ला करण्यात आल्याची माहिती मिळत आहे. सध्या सैफला लिलावती रुग्णालयात दाखल करण्यात आले असून त्याच्यावर उपचार सुरू आहेत.
हिंदी सिनेमा सृष्टीतील प्रसिद्ध अभिनेता सैफ अली खान याच्या घरात चोर घुसला होता. त्या चोराने सैफवर चाकू हल्ला केल्याची धक्कादायक घटना घडली आहे. रात्री तीनच्या सुमारास हा प्रकार घडला. मिळालेल्या माहितीनुसार, सैफ अली खान याच्या मुंबईतील घरात बुधवारी रात्री एक चोर शिरला होता. चोराला पाहून सैफच्या घरातील कर्मचाऱ्यांनी आरडाओरड सुरू केला.
त्यावेळी सैफ अली खानला जाग आली. खोलीतून बाहेर आल्यानंतर सैफ अली खान आणि चोर समोरासमोर आले. यावेळी चोराने झटापटीत चाकूने सैफ अली खानवर वार करून चोरचा पसार झाला. यामध्ये सैफ अली खानला दुखापत झाली आहे. दरम्यान त्याला लागलीच मुंबईच्या लिलावती रुग्णालयात दाखल करण्यात आले. सध्या त्याची प्रकृती स्थिर असल्याची माहिती मिळत आहे. मुंबई पोलिसांनी या घटनेची गंभीरतेनं दखल घेतली असून चोराला शोधण्यासाठी गुन्हे शाखेचे पथक कामाला लागले आहे.
सीसीटीव्ही फुटेजची तपासणी..
पोलिसांना घटनेची माहिती मिळताच, त्यांनी तात्काळ धाव घेत चौकशी सुरू केली आहे. पोलिसांनी सीसीटीव्ही फुटेज ताब्यात घेतले असून इतर माहितीच्या आधारे चोराचा शोध घेण्यास सुरुवात केली आहे.
