पाचोरा, दि. 23 – सोलापूर जिल्ह्यातील फलटन येथील सहकारी साखर कारखान्यात ऊसतोडीसाठी मजुर घेऊन जात असलेला आयशर ट्रक शुक्रवारी पहाटे सिल्लोड जवळील धानोरा ते भराडी गावाजवळ रस्त्याचे कडेला बंद असलेल्या डम्परवर जावून धडकल्याने भीषण अपघात झाल्याची घटना घडली. या अपघातात मोहाडी ता. पाचोरा येथील २७ वर्षीय महिला मजूर तर हनुमानवाडी येथील ३० वर्षीय इसम ठार झाला. तर या वाहनात पाठीमागे बसलेले सहा ऊसतोड कामगार गंभीर जखमी झाले आहेत.
जखमीवर सिल्लोड येथील उपजिल्हा रुग्णालयात उपचार सुरू आहेत. मयत कल्पना यमजी पवार यांचे पाश्चात्य पती, दोन मुले, एक मुलगी असा परिवार असून त्यांचेवर शुक्रवारी रात्री मोहाडी येथे अंत्यसंस्कार करण्यात आले होते. दरम्यान घटनेमुळे पाचोरा तालुक्यातील मोहाडी व हनुमानवाडी गावात मोठी शोककळा पसरली आहे. घटनेप्रकरणी सिल्लोड पोलिस ठाण्यात अपघाताचा गुन्हा दाखल होऊन आयशर चालकास पोलिसांनी ताब्यात घेतले आहे.
मयतांच्या नातेवाईकांना भरपाई देण्याची मागणी..
साखर कारखान्यावर ऊस तोडीसाठी जात असतांना अपघातात कल्पनाबाई पवार व प्रशांत वाघ यांचा मृत्यू झाल्याने फलटन येथील निरा – भिमा सहकारी साखर कारखान्याकडुन नुकसान भरपाई मिळावी अशी मागणी मोहाडी येथील माजी सरपंच भिवा शंकर जाधव यांनी कारखान्याच्या शेतकी अधिकाऱ्याकडे केली आहे.